Honorabilibus viris dominis et amicis karissimis domino Friderico venerabili abbati — priori totique conventui monasterii Chremsmunstrensis ordinis sancti Benedicti, Pataviensis dyocesis Johannes dei et apostolice sedis gracia Abbas, Nycolaus prior totusque conventus monasterii sancti Lamberti eiusdem ordinis Salzburgensis dyocesis cum oracionum frequencia indissolubile vinculum caritatis. Sicut caritas, que inter omnes virtutes ab eterno obtinuit principatum ita unius loci cardine non volt claudi, sed in plurima habundancius devivari. Verum quia religionis ordo principaliter hoc exigit et requirit, ut sub eo militantes mutuis consolacionibus se invicem preveniant fidelique obsequio caritatis. Eapropter, ut inter nostram et vestram ecclesiam perpetua sit unitas ac fraternalis caritas et inter nos et fratres utriusque loci fraternitas ac nexus indissolubilis semper vigeat caritatis, decernimus, statuimus ac perpetuo ratum esse volumus, ut.quicunque de fratribus vestris ad nos sive de nostris ad vos cum litteris sui abbatis pervenerit, stallum in choro, locum in refectorio, in dormitorio equam quoque porcionem in prebenda remediis, oblacionibus et in quibuscunque consolacionibus plenarie sorciatur, facientes itaque dominos et fratres monasterii vestri participes missarum, vigiliarum, oracionem, elemosinarum et omnium bonorum, que apud nos fiunt ita, quod cum mors alicuius de predicto vestro monasterio nobis intimata fuerit, tantum pro eo quantum pro uno nostri conventus carnis persolvente debitum faciemus. Ut igitur hec predicta robur perpetue obtineant firmitatis, presentem litteram nostrorum iussimus sigillorum in evidens testimonium ac cautelam munimine reborari. Actum in monasterio nostro anno domini millesimo ccc quadragesimo quarto secundo nonas Augusti.

Source Fulltext: OÖUB 6 (Wien 1872) S. 488f., Nr. 484