Nos Fridericus dei gracia Abbas in Chremsmunster et Conventus ibidem per presencia profitemur et constare volumus universis presencia inspecturis, quod dominus Fridericus, plebanus de Kaminata, motus pie consideracionis oculo, quo nostram ecclesiam in quibuslibet suis agendis pro suo posse promotivis affectibus contuetur, nobis pro utilitate nostre ecclesie mutuavit, triginta tres libras denariorum Wiennensium tali interposita paccione, ut pro eisdem denariis infirmarie nostre comparemus tres libras reddituum annuatim, verum, quia eosdem adcomparandum tam subito redditus non potuimus invenire, de communi consilio ordinavimus et statuimus, ut iidem denarii infirmarie nostre de kathedratico nostro videlicet de Welsensi ecclesia una libra, de Talhaim una, de Petenpach una annuatim sine contradiccione qualibet debeant ministrari, donec commode possimus exequi ordinacionem seu beneplacitum donatoris. Porro nos tam commendabili sue fidei seu donacioni debentes et volentes existere non ingrati, promittimus eidem et presentis scripti testimonio confirmamus, quod nos in sui memoriam et beneplacitum festum beate Marthe decetero cum duodecim leccionibus peragemus, ita ut eodem die fratribus de eisdem redditibus fiat consolatio seu pietancia specialis, et quod anniversarium suum in Missis, vigiliis et oracionibus annuatim celebrabimus juxta nostri ordinis et Monasterii consuetudinem approbatam. In cujus rei testimonium presentem litteram sibi damus Sigillorum nostrorum robore communitam. Datum anno domini M°. CCC°. quinto in die beati Jacobi apostoli.

Source Fulltext: OÖUB 5 (Wien 1868) S. 607, Nr. XI (Anhang)