Nos Fridericus Abbas, Johannes Prior totusque Conventus Monasterii in Chottwico Ord. s. Benedicti Patav. dyoc. publice recognoscimus per presentes, Quod specialem in domino gerentes sincere dileccionis affectum ad reverendum in Christo patrem ac dnum. dnum. Cholomannum prepositum, nec non venerabiles et religiosos viros Bartholomeum decanum et Conventum Monast. Can. Reg. Ord. s. Aug. in Newnburga, ut devotis ipsorum et suorum successorum precibus graciam salvatoris mereamur et valeamus salubrius impetrare, Dnos. prepositum, Decanum et Conventum predictos recepimus et presentibus recipimus in nostros et dicti nostri Monasterii fratres spirituales humiliter et intime desiderantes et dei clemenciam implorantes, vt faciat ipsos et eorum successores participes omnium et singulorum bonorum operum, que per nos ac nostros successores in dicto nostro Monasterio die noctuque vigiliis, oracionibus, Elemosinis‚ Jejuniis, Missis, aliisque divinis officiis exercentur, et que fient perpetuis temporibus in futurum. Ita cum divina volente providencia aliquem de dominis et fratribus predictis ab huius seculi peregrinacione migrare contigerit et ipsi nobis obitum huiusmodi fratris‚ prout moris est, literaliter insinuaverint, ex tunc nos requisiti fide promittimus, quod nos et nostri successores volumus et debebimus pro salute anime fratris huiusmodi conswetis oracionibus, vigiliis ac missis pro defunctis aliisque piis ac bonis operibus cum speciali devocione commemoracionem facere, quemadmodum ad solitam et regularem fraterne caritatis observanciam dinoscitur pertinere. Preterea diem translacionis s. Augustini quolibet anno cum vesperis, missarum celebracionibus ac aliis divinis officiis volumus et debebimus solempni veneracione celebrare, Ac Anniversarium Leopoldi Marchionis fundatoris dicti Newnburgensis Monasterii quolibet anno proxima die ante diem sancti Othmari Abbatis vigiliis et missarum celebracionibus pro defunctis specialiter peragere, desiderantes et caritative supplicantes, quatenus prefati domini et fratres diem translacionis sancti Benedicti consimili sollempnitate celebrare dignentur, ac Anniversarium Beati Altmanni Episcopi fundatoris dicti nostri Monasterii in die Cyriaci martiris annuatim consimiliter peragere studeant nobisque comparem in Christo caritatem et mutue fraternitatis beneficium benigniter exhibeant et impendant. Et in perpetuam memoriam et testimonialem huius fraternitatis evidenciam dominis et fratribus predictis presentes dedimus litteras nostrorum appensione sigillorum roboratas. Anno dni. Millesimo Trecentesimo Nonagesimo Sabbato proxime post festum sancti Cholomanni Martiris gloriosi in nostro Monasterio predicto.

Source Fulltext: ZEIBIG, Klosterneuburg (=FRA II/28, Wien 1868) S. 57-58