Wir Michel der Gewchramer, zu den zeiten Purgermaister vnd Mu^enzzmaister vnd der Rat gemain der Stat ze wienn vergechen - das fu^er vns komen ist in offem Rat Altman der pleintinger an ainen tail vnd hat vns gechlagt vnd fu^er gelegt, das sein pru^eder Ott der pleintinger dem got gnad, weilent vnser mitpurger sey abgegangen mit dem tod, vnd hab die hernach benanten gu^eter hinder Im lassen, darzue er rechter vnd na^egster erib sey, von erst ein weingarten gelegen an dem Chalenperg genant der Prem, vnd ein weingarten gelegen an dem Alssek ze nachst an der von waltse weingarten, vnd ein weingarten gelegen ze Medling vnd haist die lang setz vnd ein wisen ze Aichaw, gehaissen dy waynerinn, vnd ain hof gelegen zu pfaffsteten mit zwain weingarten, mit wisen vnd mit a^ekchern, die darzu gehorent, oder swas darzu gehort. Do engegen kom an dem Andern tail auch fu^er vns in offem Rat fraw kathrey, weilent des vorgenanten Otten des pleintinger witib, die nv Artolffen den Riglpekchen eleichen genomen hat, vnd sprach das der obgenant Ott der pleintinger die vorgenanten guetter alle in ir gewalt pracht hiet, da sy in eleichen genomen hiet, vnd maint darumb, das dieselben gueter ir leibgeding sein sulten, vnd chriegten darnach vor vns vmb die egenanten gueter als lang, vncz das sy denselben chrieg aller zu paider sait mit guetleichen willen vnbetwungenleich hinder vns den Rat gegangen sint zu eim Recht darumb ze sprechen, da pey sy fuerbaz vor allem krieg beleiben wollten, vnd darumb so ist in offem Rat mit vrag vnd vrtail gevallen, seind der vorgenant Ott der pleintinger die vorgenanten gueter alle in der egenanten seiner hausfrawn, frawn kathrein gewalt pracht hat, da er sey eleichen genomen hat, darumb sulle si auch dieselben gueter alle ze leibgeding ynnehaben niezzen vnd nuczen vnverchumbert vnd vngeergert vncz an im tode als leibgedinges recht ist vnd der Stat recht ze Wien, vnd denn nach irem tode schüllen die selben gueter ledikleich eriben vnd gevallen da hin sy sy den ze recht erben vnd gevallen schullen vor aller ansprach, vnd wand die sach also vor vnser in offem Rat gewandelt vnd geschechen ist‚ Daruber so geben wir In den brieff - versigilten mit der obgenanten Stat zu wienn klain anhangunden insigel. - Der brief ist geben ze Wienn - drewczehen hundert iar darnach in dem Newnczigisten iare des nagsten Eritags nach gottes leichnams tag.

Source Fulltext: ZEIBIG, Klosterneuburg (=FRA II/28, Wien 1868) S. 56-57