Ich Hanns von Mainwerch und all mein erben wir verjehen offenleich mit dem prief, daz wir dem erbern chnecht Otten im turen von Wochaw und seiner hausvrawen vrawn Katrein und ir baider erben sunn und tochteren de zwen tail des traid zehent und wein zehent ze Obrechsperg pei der Pielach, versucht und unversuecht und mit allen newnraüten verlichen haben, de si gechaufft habent von des Hafenpechen ennichlein, als sein kaufbrief sagt den er dorüber hat^a von inn, der von mir ze lechen ist; und pin des sein herr scherm und gewer, als landes recht ist ze Österreich und als ich rechtleich sol, und bestet im den brief mit meinem insigel und mit des erbern knechts insigel Jannsen des Siednicher.² Der brief ist geben nach Christs geburd dreuzehenhundert jarr darnach in dem suben und sechzkisten jarr, des phinztags in'n quatemberen, vor sand Michels tag.

Source Fulltext: LAMPEL, Urkunden Sanct Pölten (=FRA I, Wien 1981) S. 705