Ich Fridreich ich Ortlieb vnd ich Weichart prüder von Winkchel wir vergehen vnd tön chunt allen den die disen brief lesent oder hörent lesen die nu lebent vnd hernach chunftig sind, daz wir mit aller vnser erben gutem willen vnd gunst mit verdachtem mut vnd nach vnser pesten vreund rat zu der zeit do wir ez wol getun mochten verchauft haben vnsers rechten aygens vnser halbev veste ze Staynekke vnd darzu vnser halbes dorf ze Wantzenaw vnd newn schilling wienner phenninge geltes ze Fukkla vnd ayn phunt wienner phenninge geltes ze O^ephelgeswent vnd alles daz daz zu der egenanten vnser halben veste ze Stainekke gehöret vnd alles daz daz wir ze Wantzenaw ze Fukla vnd ze O^ephelgeswent gehabt haben jn vrbar ze holtz ze velde vnd ze dorffe manschaft vogtay gericht zehent waelde vischwaid phenninggu^elt wismat paw^e, ez sei gestift oder vngestift, versucht oder vnuersu^ocht, swie so daz genant ist vnd swo so daz gelegen ist. Die vorgenanten vnser halbev veste ze Staynekke vnd alles daz daz darzu gehöret vnd allez daz daz wir ze Wantzenaw ze Fukla vnd ze O^ephelgeswent gehabt haben, als ez vor an disem brief alles verschriben vnd benant ist, haben wir recht vnd redlich verchauft vnd geben mit allen den nv^etzen vnd rechten als wir ez alles in aygens gewer herpracht haben, vmb syben hundert phunt vnd vmb fumf vnd zwaintzich phunt wienner phenninge der wir gar vnd gaentzleich gewert sein, vnserm vetern hern Ortlieben von Winchel vnd allen seinen erben fu^erbaz ledichleich vnd vreileich ze haben vnd allen irn frumen da mit ze schaffen verchauffen versetzen vnd geben swem si wellen an allen irresal. Vnd ze einer pezzern sicherhait so setzen wir vns ich Fridreich, ich Ortlieb vnd ich Weichart prüder von Winchel vnd vnser erben vnuerschaidenleich v^eber die vorgenanten halben veste ze Stainekke vnd vber alles daz daz darzu geho^eret vnd vber alles daz daz wir ze Wantzenaw ze Fukkla vnd ze O^ephelgeswent gehabt haben, als es alles vor an disem brief verschriben vnd benant ist, dem obgenanten vnserm vetern hern Ortlieben von Winchel vnd allen seinen erben ze rechten gewern vnd scherm für alle ansprach als aygens recht ist vnd des landes recht ze O^esterreich. Waer aber daz si mit recht an demselben gut allem icht chrieges oder ansprach gewunnen, swaz si des schaden nement daz suln wir in alles ausrichten vnd widerchern an allen irn schaden vnd suln auch si daz haben auf vns vnuerschaidenleich vnd auf allem vnserm gut daz wir haben in dem lande ze O^esterreich wir sein lebentich oder tode. Vnd daz diser chauf fürbaz also staet vnd vnzerbrochen beleibe, darvber so geben wir jch Fridreich ich Ortlieb vnd ich Weichart pru^eder von Winchel dem vorgenanten vnserm vettern hern Ortlieben von Winchel vnd seinen erben disen brief zu einem warn vrchunde vnd ze einer ewigen vestnunge diser sache versigelt mit vnsern insigiln vnd mit der erbern herren insigeln die hernach an disem brief geschriben stent, hern Reymprechts von Walsse von Ens hern Reymprechts von Scho^ennberch hern Hainreichs von Walsse hauptman ze Drosedorf vnd hern Jansen des Tu^ersen von Rauhenekke mein vorgenanten Fridreichs sweher, die alle, diser sache gezeuge sint mit irn insigiln. Der prief ist geben ze Wienne nach Christes geburt dreutzehen hundert iar darnach in dem syben vnd fumftzgisten iar des maentags an dem achten tage nach sant Philips vnd sant Jacobstage der heiligen zwelifpoten.

Source Fulltext: OÖUB 7 (Wien 1876), S. 504ff., Nr. 496