Ich Eberhard der Chappeller von Chappell vnd ich Johans der Chappeller von Chappell sein vetter veriehen vnd tün chund fur vns vnser hausfrown vnd vnser erben offenleich mit disem brief, daz wir hern Albrechten von Staudach vitztum bei der Rot hern Wernhern von Staudach seinen bruder vnd hern Ludwigen auf dem Stain irn hausfrown vnd irn erben von vnser liben gnedigen herren hern Stephans hern Wilhalms vnd hern Albrechts pfallentzgrafen ze Reyn vnd hertzogen in Payrn vnd ouch von vnser gnedigen herschaft hertzog Albrechts ze O^esterreich vnd hertzog Rudolfs seins sunes irr hausfrown vnd irr erben haizz vnd geschefts wegen gelobt vnd gehaizzen haben bei vnsern trewn, daz wir si an der mautt ze Schêrding hin naw vnd wider wazzers an dem Newnhaus bei Schêrding vnd an der purchhu^ot die geho^ert zu dem Newnhaus getrewlich schirmen sullen als lang, bis daz si des gelts gentzlich verricht werdent daz si von vnser vorgenanten herschaft habent vf derselben mautt vber daz Newhaus vnd vmb die purchhu^ot nach der brief sag, die si von in darvber habent also, die weil wir die pfleg Schêrding innhaben, wa^er aber daz man vns da enthousen oder vercheren wold, so sullen wir die pflêg auz vnser gewalt nicht geben noch vns da enthusen lazzen, ez geb denn der dem man die pflêg inantwurt der ein piderman ist vnd dem ze gelauben vnd ze getrewn ist, dem vorgenanten hern Albrechten von Staudach hern Wernhern seinen bru^eder hern Ludwigen auf dem Stain irn hausfrown vnd iren erben von im seiner hausfrown vnd seinen erben einen als gu^eten brief als der ist, den wir in darvber geben haben, vnd daz sol als oft vnd als dikch von ainem pfleger an den andern geschehen, vntz daz si irs gelts nach rechter anzal gentzlich verricht werdent nach der brief sag die si von vnser vorgenanten herschaft darvber habent. wer ouch daz vnser eintweder nicht enwer die weil wir die pfleg innhaben des Got nicht geb, so sol ez der ander tu^en der dennoch lebendig ist. Wer aber daz wir baid abgiengen oder bechumert wurden des Got nicht well, sullen ez vnser hausfrown vnd erben tu^en oder swer vnser pfleger da ist in aller der mazz als wir selb vnd als vorgeschriben stat, vnd darvber ze vrchund geben wir in disen brief versigelten mit vnser baider jnsigeln die daran hangent. Datum anno domini mccc^mo lvij/mo Dominica post jnuentionem sancte crucis.

Source Fulltext: OÖUB 7 (Wien 1876), S. 503f., Nr. 495