Ich Vlreich prvschinche vnd ich Fridreich sein pruder veriehen an dysem prief vnd tuen chunt allen den, dye in sechent oder horent lesen, dye nu sint oder noch chunftiche werdend, daz wier mit verdachtem mu^et vnd mit guetem willen aller vnser erwen zu den zeyten, du wir is wol getu^en machten, verchauft hawen deu lehenschaft auf dem zehent dacz hetzleinsperg vlrichen dem pirchinger vnd Fridreichen seinem prvder, den seu von vns gehabt hawent, vnd auch allen iren erwen also mit peschaydener red, daz wier vor genanten prvschinchen den e genanten pirchineren deu lehenschaft svln auf gewen auf dem zehent, der vor gescriwen ist, vor dem pyschof oder vor swem seu welent, der an seiner stat ist, vnd schol daz geschehen inner iarsfrist, also daz seu dhainen schaden dar nemein, daz schuln seu hawen auf vnsern tryuen vnd auf aller vnser hab, swa wier dye hawen, inner lantz oder auser lantz. daz in deu red stet vnd vnuerchert peleib, dar wer gebin in disen prief versigelt mit vnser payder hangundem insigel. Der prief ist geben, du von christes gepurd ergangen waren dreuzehen hundert iar, darnach in dem ains vnd dreystigem iar an sand veytz tache.

Source Fulltext: OÖUB 6 (Wien 1972), S. 24f., Nr. 20