Jch Dyetmar von Lerbuchel vnd ich Elspet sein housvrow vnd all vnser erben wir veriehen offenbar an disem brief vnd tu^en chunt allen den, die in sehent, lesent oder horent lesen, Daz vns vnser herren der hochgebo^ern chvnig Friderich vnd sein bru^eder di werden hertzogen von O^esterreich erlaubt habent ze baw^en von iern gnaden, daz hous Tolet vm vnsern dinst vnd ouch dorvm, daz wir di aigenschaft des selben hous ouz pracht solten haben von den edeln herren hern Albern von Rouhenstain vnd hern O^ertlieben von winchel also, daz wi\er vnd vnser erben vnd nachchomen daz selb hous Tolet von der herschaft von O^esterreich ze rechtem lehen ewichl eich haben sulln vnd der selben ouz bringum haben wir nich getan, als vor verschriben ist, vnd heten dorvmb ze porigen gesatz hern Hainrichen von achleiten, hern Espein von hag, hern Albern von lauterbach, hern Otten von perchaim, Dyetmaren von aistershaim, Teym von pernaw, vlrichen von Ruezhaim, Jansen von achleiten. vnd dorvm daz di ouz bringum nicht geschehen ist, als oben geschriben ist, so woren di porigen verfallen vnd daz selb hous Tolet in hern Eberharst gewalt von walsse. nv hat vns her Eberhart von walsse die gnad getan, daz er vnser porigen hat ledig lazzen, vnd dor vm haben wier vns in den val vnd in alle die punt, do vnser porigen inn woren, verpunden mit vnserm aid, wier loben ouch, daz dem lande vnd lauten von dem hous vnd dor zue dehain schad wider varen sol, wier schullen ouch der herschaft vnd des lantrichter leut in lazzen vnd, ob ez not ist, ouz dem hous v^erleugen an vnsern perleichen schaden, wer aber, daz wier der ding dehainz vber fu^ern vnd nicht teten, als vor beschaiden ist, so hat sich vnser hous Tolet vnd all vnser hab veruallen in hern Eberharts gewalt von walsse vnd schullen wier iem daz hous mit gantzem bow in antwu^erten, wenn er ez vodert oder swer Lantrichter ob der Ens ist. Ez schullen ouch all vnser Erben oder wer daz hous nach vns eribt, in allen den punden vnd gelubten sein, do wier vns in verpunden haben mit disem brief, vnd daz dise red hern Eberharten von walsse oder swer Lantrichter ob der Ens ist, staet vnd vnuerchert beleib, daz geluben wier iem ze laisten mit vnserm aid vnd sol ez ouch haben ouf aller der hab, di wier haben in dem lant ze O^esterreich oder swo wier sel haben, vnd dor uber gib ich egenanter Dyetmar von lerpuchl disen offen brief versygelten mit meinem jnsygel. Der sache sint zeug herre Jansen von Gvndoluing, her heinreich von anhang, her vlrich fuly, v^etz von Tann ieder man mit seinem jnsygel. Der brief ist geben nach Christs geburd dreutzehen hvndert jar dor nach in dem ainz vnd dreizzigistem jar, des pfintztags nach dem O^estertag.

Source Fulltext: OÖUB 6 (Wien 1972), S. 6f., Nr. 6