JCH vlrich der Schiffer vnd mein Hawsfraw Agnes vnd all vnser Erben veriechen mit dem brief, Das wir mit wolbedachtem Muett vnd nach Ratt aller vnser pesten frewndt willen vnd wortt den Edlen wolgeboren vnsern gnadigen Herren graf hainrichen, graf wernhartten, graf wilhalbmen, graf Ruedolffen vnd graf fridreichen geprudern vnd grauen zw Schawnberg vnd allen jren Eriben mit der vest zw Stainsultz mit allen den gutern, vnd was darzw gehörtt vnd wie das alles genannt ist, nichts ausgenomen, gewa^erttig vnd wartund sullen sein, damit das kain geuar icht da sey, Es sey dan mit irem gutlichem willen vnd wartt, das in vnd allen jren Eriben vnd Nachkomen (von keinen) Herren, wie die genant ist, geistlicher oder weltlicher Herr icht Krieg dauon auferstu^een (sic). Tatten wir des nichtt, was sy des schaden Namen oder wie der schad aller genant mag sein, den vnser egenanter Herre oder sein Eriben an aid vnd vngesworen nur mit jren wartten darumb zu gelawben gesprechen mu^egen, dieselben schaden schullen sy haben vnuerschaidenlichen datz vnns, vnsern Erben vnd nachkomen vnd vnsern trewn vnd darzw auf aller vnser hab, wo wir dj v^eberall indertt haben, lassen oder gewingen, versucht vnd vnuersuchtt, auf wasser vnd auf lant, da schulten sy sich derselben vnser hab vnderwinden mit vnserm vnd jrem gutlichem willen vnd wartt; vnd dawider schol vnns kain weltlicher noch geistlicher furst, stett, vest, marckcht oder wie dj herschafft alle genant mag sein, vns, vnsern Eriben wider vnser vorgenant gnadig herren nicht halten an alles geua^er. Vnd des zw Vrkund geben wir in den brief versigelt fu^er mich, mein Eriben mit meinem anhangunden Jnsigl vnd darzw mit der Erbern weisen Otten des Hochenfelder, Jacoben des strachner, Ruegers des Hochnuelder vnd Sighartz des gruebers anhangunden Jnsigl, dj irew Jnsigl durich vnser vleisigen pett willen ze zewgnus an den brief gehangen haben in an schaden, darunder wir vnns vnd.all vnser Erben vnd nachkomen verpinden mit vnsern trewenn alles das war vnd statt zw halten vnd. zw volfuren, das an dem brief geschriben stett, der geben ist zw Schawnberg des suntags Nach sand gregorigen tag, do man zallt von Kristi gepurt XIIJ. hundert Jar, darnach in dem ains vnd dreissigistenn Jarenn.

Source Fulltext: OÖUB 6 (Wien 1972), S. 5f., Nr. 5