ICH Ortlib Gvmpreht pvrger ze Regenspvrch vergih vnd tvn chvnt an disem prieve, Daz ich fvr mich vnd fvr hern Chvnraden den Loebel, fvr hern wernhern avf Tvenawe, fvr hern paltramen seinen prvder vnd fvr ander mein geselschaft pvrger ze Regenspvrch, von den ich gantzzen gewalt han, mich nah rat der edeln herren Graven Albrehtes von Hals, hern albers von chvnringen, hern Ekchen von Liehtenberch vnd nah rat meins aidems Haimleins vnd Simons des Mavter ze Lintz zv vereben vnd zv verrihten mit dem erbaern herren hern Eberharten von walsse, zv den Zeiten Lantrihter ob der ens vmb die gvlte, die er vns gelten sol, vmb havpgvt vnd vmb schaden vnd vmb alle sache lieplich vnd gvtlih mit vnserm willen paidenthalben also, daz her Eberhart von walsse der vorgenant oder sein svn oder sein havsvrowe, ob er in der zeit niht enwaere, geben vnd verrihten sol mich Ortlieben Gvmpreht vnd mein geselschaft an dem zehenten tage nah dem phingisttage zwai hvndert march, zv den Svniwenten, die nv schierist choment, zwai hvndert march, silbers, ie zwen vnd sibenzich grozzer Prager phenninge fvr die march; tvnt er des niht, so svln die ersten zwai hvndert march silbers vervallen sein; vnd swo er vns des selben silbers niht enwert zv den vorgenanten tagen, so sol her Eberhart von walsse selb vnd Simon der Mavtter von Lintz Avf der stat ze wienne in varen in eins erbaern wiertes havs, laisten als laistens reht ist vnd nimmer avz chomen, vntz wir des vorgenanten silbers gewert werden, vnd sol ich Ortlieb Gvmpreht vnd mein geselschaft alles vnser reht dannoh haben ze manen als vnser alt hantveste sait, die wir von im vnd von den pvrgen haben, vnd als wir des vorgenanten silbers gewert sein, so sol er mir Ortlieben Gvmprehten vnd meiner geselschaft gelten an dem nahsten sand Michels tage dar nah vnd avh weren zwai hvndert march vnd vierzich march avh fvr ie die march zwen vnd sibenzich prager phenninge; vnd also ist, daz er des vorgenanten silbers an sand Michels tage niht enwert, so svln sih die ersten vier hvndert march gentzlich vervallen haben vnd svln wir vodern vnd manen als von erst, vnd sol avh zv iglichem tage daz gvt von Lintz belaitten vntz hintz Pazzawe mir Ortlieben Gvmprehten vnd meiner geselschaft an verlvst. Daz dise schiedvng vnd dise ebnvnge von vns als vor an disem prieve geschriben ist, staet gentzlih vnd vnverchert beleibe, dar vber gib ich Ortlieb Gvmpreht fvr mich vnd fvr mein geselschaft disen prief versigilt mit meinem insigil. Diser prief ist geben an dem phingisttage nah christes gebvrt vber drevtzehen hvndert iar, dar nah in dem sibenzehenten Jar.

Source Fulltext: OÖUB 5 (Wien 1868), S. 191-192, Nr. 193