Ich Chunrat der Schoewrnbeckhe vnd ich Nyclo sein brueder vnt ich Fridreich sein brueder wir veriehen vnt tv^en chvnt Allen den, die disen brief lesent oder ho^ernt lesen, die nv sint vnt noh chvnftich sint, Daz wir mit guetem willen vnt mit verdahtem mv^et vnt mit vnser besten vrevnde rat vnt mit gesampter hant haben ze chowffen gegeben hern Meinharten von wiermla vnsern zehent datze Ratoltstorf mit nvtze vnd mit gewer vnd mit allem dem reht, vnd wir in gehabt haben von vnserm herren dem pischolf von Pazzowe, vmb Ohtzich phvnt phennige wienner Mvnzze, der wir reht vnd redleich gewert sein, vnt loben im auh daz mit vnsern trewen, wanne er vns vodert mit im selbe oder mit seinem boten oder mit seinem brief fu^er vnsern herren den pischolf oder fu^er seinen vitztv°m, daz wir im den selben zehent suln auf geben vnt bestaetigen mit vnser choste an allen seinen schaden, vnt ob er niht ist, so sul wir daz selbe gelvbde laisten allen seinen erben, die chnehte sint, wir suln im auh den selben zehent schermen vnt gewern sein fu^er alle ansprach, also reht vnt gewonhait ist in dem Lande ze o^esterreich; welhen schaden er daruber an disem zehent nimt, den sul wir im ab tv°n; wellen aber wir des wider sein, so sol im vnser herre der fu^erste in o^esterrech mit vnserm gvten willen fuer den selben schaden phant antwvrten von alle dem, daz wir haben in dem Lande ze o^esterrech, wie daz genant ist, vnd daz dev rede also staette vnd vnzebrochen beleibe, dar vber so geben wir hern Meinharten von wiermla vnt seinen erben, daz chnehte sint, disen Brief zv einem gezewge vnt zv einem vrchvnde vnt zv einer gantzen sicherhait diser sache vervestent vnt bestaetiget mit vnser aller dreyr brueder hangunden jnsigiln vnd mit den erbern gezewgen, die dar an geschriben sint, Daz ist her chu^enrat von Arnstayn, her Ludweich von zelkinge, her chunrat von Tyrnstayn, her weichart von planchenstayn, her weichart von Ramstayn, lvdweich von zelkinge der iunge, her hainreih von Tanprukke vnd ander erbaer lewte genv^ege, den disev rede wol chunt vnd gewizzen ist. Der Brief ist gegeben datz Sant Po^elten, Do von Christes gebvert ergangen warn Drevzehen hvndert jar vnd dar nah in dem Sybenzehenten jar An dem Svnnewentage.

Source Fulltext: OÖUB 5 (Wien 1868), S. 192-193, Nr. 194