Wir Elizabeth weilen Chuniginne von Rom veriehen vnd tun chunt offenlichen allen den, di disen Brief sehent oder horent lesen, daz wir ze Halstat ze vnserm newen Sieden, daz wir von wilden gebirge vnd gru^enen wasen gepawet vnd gestiftet haben mit vnserm aigen gute, Sigharten Thurn, dem Mitterwiser, Otten dem Po^etschner, ||
Otten dem Glainlein vnd Pertholden Seeau ir iglichen sunderlichen vnd seinen Erben ain Phanbausstat haben verlihen ze rechten lehen Also beschaidenleich, daz ir iglicher mit Haus an der Halstat sitzen soll, ouch daz Saltz mit sein selbst leib arbaiten in dem Phanhaus aus der Phanen vnd soll in funfen vnd den siben vnsern Burchmanen, den wir ouch siben Phanhaussta^ete verlihen haben, vor ir arbeit daz sibent Fuder zufallen von dem Saltze, daz ze Halstat wirt gesoten. Sie sollen vns ouch vmbsunst arbaiten one Lon alles daz Saltz, daz von gesatzten recht dem Pharer vnd andern La^euten in dem Phanhaus zuvalet, ez sol ouch ir iglicher dem Pharer ainen phenninch geben von seiner Phanhausstat. Si sollen vns ouch gutleich besorgen an allen dem, so ze dem sieden geho^eret vnd wo si vnsers Schadens innen werden in dem Phanhaus, den sollen sie vnsern getrewen Burchl\euten vnd den Schreibern melden; verschwigen sie aber mit wizzen vnsers Schadens, wo si daz u^eberwehret wurden mit recht, so stunt vns ir Phanhausstat ledig vnd ist ir leib vnd ir gut in vnser gewalt gefalen. Vnd daru^eber, daz dise vorgeschriebene Rechte inen vnd iren erben von vns vnd vnsern nachchomen stete vnd vnzebrochen beleiben, geben wir in disen Brief besigelten mit vnsern Insigel zu ainer vrchunde der warheit. Der Brief ist geben zu Brucke in Arigowe, Do man zalt von Christes geburte Dreuzehen hundert vnd in Ainleften Jar am sand Agnesen tage.

Source Fulltext: OÖUB 5 (Wien 1868), S. 42-43, Nr. 40