Ich Ott von Steir vergihe an disem prief vnd tuen auch chunt allen den, die nu sint vnd noh chumftich werdent, daz ich vern Elspeten Chunrates Hausvrowen des Dringer allez daz Guet, swiez genant ist gesueht vnd vngesueht, deu Hueb pei weinzurel vnd daz Lehen in dem Gereut vnd swaz, er von mir ze lehen hat derselb Chunrat der Dringer, gelihen han ze rehtem lehen ir vnd ir erben ewichleich ze besitzen. Vnd daz deu Lehenschaft vnd diseu red staet vnd unzerbrochen beleib, des gib ich ir meinen disen prief mit meinem Insigel versigelt ze ainem warem vrchvnde. Vnd sint des gezeug Her Gundacher von dem Losenstain, Her Vlreich von Gruenenburch, Her Gundacher von Steir, Chunrat der windischgraetzer, Herman von Hautzenpach, Vlreich der Tampech, Hainreich von Mettendorf, Rudolf der amman, Dietmar der Durrenholtzer, weigant von werherspuech vnd ander vrum leut. Vnd ist der prief gegeben nah Christes gepurt vber Dreuzehen hundert Jar des nahsten Ertages nah der Liehtmisse.

Source Fulltext: OÖUB 4 (Wien 1867), S. 330-331, Nr. 354