Nicolaus dei gratia sancte sedis Aquilegensis patriarcha. Dilecto in Christo filio Ottakaro plebano in Stayn nostre Aquilegensis diocesis salutem in auctore salutis. Cum a nobis petitur quod iustum est et honestum, illud nos decet admittere favorabiliter et benigne, potissime ubi ex eo cultus augmentetur diuinus et profectus sequitur animarum. Sane nobis intimare curasti, quod tu de salute propria cogitans pro tue parentumque tuorum remedio animarum unum monasterium ordinis sancte Clare in oppido Lok nostre Aquilegensis diocesis construi tuis propriis sumptibus facere decreuisti ac de bonis tui patrimonii dotare, taliter quod ex eis conventus monialium ibidem collocandus cum aliquibus capellanis seu fratribus commode poterit sustentari, propter quod nobis humiliter supplicasti ut propositum tuum huiusmodi gratis dignaremur favoribus acceptare et conventionem hoc super per te habitam cum plebano in Lok infrascripti tenoris etiam confirmare. Nos itaque tuis devotis supplicationibus inclinati dictum tuum laudabile ac salutiferum propositum in domino commendantes fundationem predicti monasterii per te ut premittitur, faciendam ac ejus dotem nec non conventionem predictam contentis in litteris infrascriptis ratas et gratas habemus ipsasque omni modo iure et forma quibus melius possumus de predicti plebani in Lok expresso consensu auctoritate ordinaria tenore presentium approbamus, ratificamus ac etiam confirmamus, hoc adiecto quod anniversarium nostrum, predecessorum ac successorum nostrorum patriarcharum Aquilegensium annis singulis tertia die post octavam festi Resurrectionis per predictum conventum solemniter cantari et celebrari facere perpetuo tenearis. Tenor autem litterarum conventionis predicte noscitur esse talis:||
Folgt nun der Vergleich des Pfarrers Hilbrand Hak von Lack mit Pfarrer Otakar von Stein ddo. 1358, 30. Jänner, ..... (Nr. 727).||
In quorum omnium testimonium et perpetui roboris firmitatem presentes fieri iussimus nos patriarcha predictus et nostri sigilli appensione muniri. Datum Utini in nostro patriarchali palatio, die tertio mensis Februarii, anno dominice nativitatis MCCCLVIII., indictione XI.

Source Fulltext: ZAHN, Codex Diplomaticus (=FRA II/35, Wien 1871) S. 321-322