Wir Albrecht von gotes genaden byschof ze Freysingen veriehen offenlich mit disem brief allen den die in an sehent oder hoerent lesen, daz wir vnz mit vnsern trewen, mit wol verdachtem mu^ot, an allez geuerde verlu^obt vnd gepunden haben gegen dem ersam geystlichen laeu^oten pru^oder Johansen zden zeiten prior ze Aller heiligen tal ze Maurbach dez ordens von Chartus vnd gegen dem conuent gemain dez selben chlosters vmb den perch gelegen ze Mavrbach der da haizzet der Chalochsperg, der vnser rechtz aigen gewesen ist vnd den wir in mit samt der aigenschaft ze chauffen haben geben vmb sechtzzig pfunt Wienner phenning, der si vnz gantz vnd gar verricht vnd gewert habent, alz der chauf brief sagt den si von vnz dar veber habent, allso daz wir in den selben chauf dez egenanten pergs mit aigenschaft mit alle mit vnsers capitels insigel ze Freysingen ze einem rechten chaufgu^ot besteten, verschreiben vnd avs richten suellen so wir aller schierst mugen, an allez geuerde alz dez landes recht ist in Oesterrich. Waer aber, daz wir vorgenanter Albrecht inner der zeit mit dem leben ab giengen dez got nicht geb, ee daz in der egenant chauf mit vnsers capitels insigel bestett wurde in dem rechten alz vor benant ist, so suellen si dann fuerbas allez daz gu^ot daz zu^o vnserm bystu^om ze Freysingen gehoert vnd daz in dem land ze Oesterrich leit, ez sei erbguet oder varunt guet, an allez fuerbot vnd an all chlag vnd auch an allez recht vollen gewalt vnd recht haben dar vmb ze noetten vnd ze phenden, alz ver daz in der chauf dez egenanten pergs mit aigenschaft mit alle mit dez capitels insigel ze Freysingen gantz vnd gar bestett, verschriben vnd avs gericht werde in allem dem rechten alz vorgeschriben stet, an allen iren schaden. Moecht aber dez allez nicht gesein, so suellen wir oder vnser nachkomen den oftgenanten . . . dem prior vnd dem conuent ze Mavrbach wider, cheren vnd wider antwerten die vorgeschriben sechtzzig pfunt phenning, vnd swenn wir daz getan haben, so sein wir in fuerbas nichtz mer gebunden vnd sol der chaufbrief vnd allev andreu handlung die sich dar vmb zwischen vnser ergangen hat, fverbas chain chraft mer haben, vnd sol in dez vnser genediger herr hertzzog Albrecht in Oesterrich oder sein nachkomen geholfen sein, vnd sol auch dez ir scherm sein vor aller ansprach alz wir in dez selber gepeten haben. Vnd dar veber ze vrchu^onde geben wir in disen brief mit vnserm anhangenden insigel besigelten der geben ist ze Wienn an dem nechsten Svnntag vor Mitteruasten nach Christes geburt dreuzehen hundert jar, dar nach in dem vier vnd fu^onftzzigisten jar.

Source Fulltext: ZAHN, Codex Diplomaticus (=FRA II/35, Wien 1871) S. 302-303