Ich Seyfrid von Welcz vnd all mein erben veriehen offenlichen mit disem briefe vnd tu^on chunt allen den den er furchumt, di in sehent, hoerent oder lesent, die nv lebent vnd her nah geborn werdent, daz wir mit woluerdahtem mu^ote vnd ze den zeiten do wir ez wol getu^on mohten, dem ersamen manne Nyklan dem Weniger purger ze Judenburch, vrowen Kathrein seiner hausfrowen vnd allen ieren erben verchauft vnd aufgebn haben mit der herren hant da si vnser lehen von sint, zway gu^ot, ain swayg gelegen an dem Chrumpekk ob Welcz da Sighart auf sicz, vnd ain su^ochung in der Selich an der alben mit alle dev vnd dar zv^o gehoert, gesu^ocht vnd vngesu^ocht, gebowen vnd vngebowen, an holcz, waid vnd an achern, an wazzer, an in vart vnd an auz uart vnd mit allen dem rehten als wirs vnd vnser vordern in nucz vnd in gewer her haben bracht, vmbe ain vnd vierczich march silber gewegens Wienner gewihtes der wir gar vnd gentzlich gewert sein, vnd sol ich vnd all mein erben Nyclan dem vorgenanten, seiner hausfrowen vnd allen sein erben di obn genanten lehen vnd allez daz der zv^o geho^ert, getreulichen schermen vor aller ansprach nah lehens reht vnd als daz lant Steyr mit alter gewonhait her hat bracht. Tu^on wir des niht vnd daz in di vorgesprochen gu^ot mit bezzerm reht wurden anbehabt, swelhen schaden si des nement, Nycla der oftgenant sein hausfrow vnd sein erben den si bey i\er selbs aide mugen gesagen an all ander bewerung, den sullen wir in abtu^on gentzlichen an alle chlag vnd taidinch vnd sulen den haben auf vns vnd auf alle dev vnd wir haben, vnd get in des an vns icht ab, daz sulen si haben auf vnsern oehaim Fritzen von Teuffenpach den wir in ze vnser selber vnuerschaidenlichen ze purgel dar vmbe haben gesacz vnd mit guetlichem willen an als geuerde (der) in dar vmb gelubt hat mit sein trewen. Auch vergih ich Fritz von Teufenpach der purgelschaft vnd der gelubde vmb dem scherm als vorgeschriben stet. Daz daz stet vnd vnzebrochen belibe gebn wir in disen brief ze ainem offem vrchunde vnd ze gezeuge der warhait versigelt mit vnser paider anhangunden insigeln vnd sint des gezeuch dar vber Fritz der lantrichter, Wulfinch der Welczer, Dietrich der amptman, Chu^onrat von Pederdorf, Weigant der Fulziech, V^olrich der Silberchnolle, Reicher der Chreli, Jans der Truller, Jacob der sneyder, Jans Perman vnd ander erber leut mer. Der brif ist geben ze Judenburch vnd ist geschehen do man zalt von Christes gebu^ort tausent iar, drevhundert iar vnd dar nah in dem ain vnd dreizzigisten iare, an sand Gregorygen tage des heiligen pabstes vnd lerer.

Source Fulltext: ZAHN, Codex Diplomaticus (=FRA II/35, Wien 1871) S. 189-190