Ich Rech von Luftenberch vergich vnd tun chvnt allen den die disen brief ansehent oder horont lesen, daz ich meinem lieben herren dem ersamen bischof Emchon von Freisingen vnd seinem goteshaus. verchaufet han vnd verchauffe ein lehen datz Prunne niderhalbe Holenburch daz mein lehen gewesen ist von seinen genaden, vnd dar vmbe enphangen han sechs pfunt Wienner pfenninge vnd han im daz selbe lehen auf gegeben an disem brief vnd gesant vnd verzeich mich an dem selben lehen alles des rechtes daz ich vnd alle mein erben daran gehabt haben oder mohten gehaben hinne fur, vnd wer iemen der daz selbe lehen an spraeche, daz ich des gwer vnd versprecher (!) sei nach des landes gewonheit als reht ist vntz daz der selbe mein herre der bischof vnd sein goteshaus ze gantzer gwer chome(n)t. Vnd daz ich daz also staet behalte, gib ich disen offen brief ze einem vrchvnde dar veber. Der brief ist gegeben ze Luftenberch da von Christes gebvert waren drevtzehen hvndert iar vnd da nach in dem ersten iar, des naechsten Svntages vor Vnser frawen tage ze Liehtmese.

Source Fulltext: ZAHN, Codex Diplomaticus (=FRA II/35, Wien 1871) S. 7