Wir Marquarde von Graetz, Volker Nvzperger, Fritze vnd Levtolde von Lantzawe veriehen vnd tu^on chvnt allen den die disen brief ansehent oder hoerent lesen, daz wir durch besvnder frevntschafte Dominiken des Rainischen burgers von Lok buergen sein worden gegen vnserm herren dem ersamen bischof Emchen von Frisingen vnd gelobt haben fuer in vnser igleicher vmbe fvemf vnd zwaintzich march Aglayer pfenninge mit so getaner ausgenomener beschaidenheit, ob der selbe Raynisch von hinne vntz auf Ostern die schierst choment, vnd von danne veber vier iar auf die selben vrist wir borgen sein, sich vergaezze alz verre, daz er von dem goteshause von Frisingen fuere oder mit heirat auz des goteshaus gwalt cheret, daz wir dez vorgnanten gu^otes enpfallen sein vnd schuldich worden dem vorgenanten vnserm herren bischof Emchen oder seinen nachomen als reht gescholen desselben gu^otes vnd svlen in des selben gu^otes verrihten in viertzehen tagen in oder seinen haubtman oder seinen schreiber die er danne ze Lok hat, swo wir daran sawmich waeren, so habent si gwalt vns ze manen an vnsers herrn des bischofs stat vnd svlen wir danne als wir gelobt haben einvaren se Lok in vierzechen tagen vnd laisten in rechter geiselscheft als lange vntz daz vnser igleicher des gu^otes verihtet als verre er schuldich ist. Waer auch daz wir alle oder vnser etlicher sich als verre vergaezze, daz er an vrloube auz fuere, swelichen schaden des vnser vorgeschribener herre naeme oder sein goteshause, des sein wir im schuldich ab ze tu^on vnd sol er des bechomen von vnserm leibe oder von vnserm gu^ot. Ez ist auch mit rede auzgenomen, ob wir von herren not oder von ehafter not dez bedwengen w^erden daz wir nicht gelaisten mochten, swenne dev ehaft not ein ende hat, so sulen wir laisten an gevaerde als vor begrifen ist, vnd an alle vebel liste vns an der porgschaft behalten als vensern eren wol an stet. Dar vber daz wir daz staet behalten vnd daran dhain zweiuel mvge auf gesten, geben wir disen brief ze ainem vrchvende versigelten mit vnsern hangenden insigeln. Der ist gegeben ze Lok da von Christes gebvert waren zwelf hvndert iar vnd in dem einen vnd hvendertisten (!) iar, des naehsten Svntags von Mitter vasten.

Source Fulltext: ZAHN, Codex Diplomaticus (=FRA II/35, Wien 1871) S. 8-9