Ego Martinus, Flavineii archidiaconus, notum facio tam futuris quam presentibus quod dominus Guido de Venerri in presentia nostra constitutus dedit et in perpetuam elemosinam concessit Deo et ecclesie Fonteneti pro remedio anime sue et antecessorum suorum libere et absolute omnia que habebat in decimis de Grangiis et de Grinione tam bladi quam vini et tractus earumdem decimarum, hoc excepto quod de ipsis decimis unum modium vini dedit monacho et capellano de Grinione annuo jure persolvendum. Dedit etiam idem Guido jamdictis fratribus et concessit quicquid adquirere poterunt in alia parte dictarum decimarum que sunt de feodo suo. Hoc totum laudavit uxor sua Adelina, Huguo et Guido filii ipsius. Quod ut ratum sit et firmum maneat in posterum ad petitionem ipsius Guidonis huic scripto sigillum meum apposui. Actum anno gratie m° cc° xii°.