Wir Maximilian, von gots gnaden rómischer kúnig, zú allenntzeiten merer des reichs, zu Hungern, Dalmacien, Croacien etc. kúnig, ertzhertzog zu Osterreich, hertzog zu Burgundi, zu Brabannt, zu Gheldern etc., grave zú Flanndern, zu Tirol etc., bekennen, daz unns unnser getréwn lieben .. der richter und rate zu Zwetl von den nutz(e)n und rénntten unnserr embter daselbs zu Zwetl, so sy nach bevelh weilennd unnsers lieben herrn und vatter des rómischen kaiser etc. loblícher gedechtnuss von néwn iaren, die sich zu den Weichnachten des fúnfundachtzigisten iars angefanngen und zu den Weichnachten zú anfanng des vierúndnéwntzigisten iars geenndet, siben iar yedes derselben iar umb hundert und fúnfczig phunt phening und von den lessten zwáyn iaren, das ist das zway- und dréwundnéwntzigisten iares, yedes derselben iar umb dréwhundert phunt phennig in bestannds weis inngehabt und gehanndelt, das alles in ainer summa mitsambt den zway tawsennt hundert achtundviertzig phund und néwnunddreissig phening, so dieselben unnser burger von dem gemelten unnserm lieben herrn und vatter etc. und von weilennd ertzbischof Johannsen von Saltzburg zu behúttúng der gemelten unnserr stat emphanngen, drew tawsennt siben hundert achtundnewntzig phúnt und néwnunddreissig phening bringt, in béywesen unnserr lieben getréwn Casparn von Rogenndorf, Iórgen Rottaler, Doctor Iohann Fuchsmag und Symon von Hungerspach, unnsers schatzmaister general, unnsrer rete, ain aufrichtige, volkomene raittúng getan haben, und da alles einnemen und ausgeben gegenneinannder gelegt und aufgehebt, sein wir in mit redlicher raittung schuldig worden fumftzehenhundert néwnunddreissig phunt vier schilling und ainundzwaintzig phening, daran sy unns néwnhundert néwnunddreissig phunt vier schilling und ainundzwaintzig phening nachgelassen haben, deshalben wir in noch sechshunndert phunt phennig per restat schuldig beleiben, der wir sy zu betzallen auf die selben émbter gewisen haben, also daz sy sechs iar, die négsten nachéinannder komént, alle iar von den yetzgemelten embtern hundert phunt phening in abslag der berúrten sechshúndert phunt phening nemen sullen, solanng bis dieselben sechshundert phunt phening betzallt sein, und sagen darauf die genannten unnser burger zu Zwetl und ir nachkómen sólher ir hanndlúng, einnemens und ausgebens, der gemelten unnserr nútz und rénntt der obbestimbten unnserr embter und des einnemens von der kaiserlichen maiestat und ertzbischof Iohannsen zu Saltzbúrg von den vorgeschriben iaren ganntz quit, ledig und los, ungevérlich. Mit urkund des briefs geben am Sambstag vor sannd Katherinen tag nach Cristi geburde viertzehenhundert und im vierúndnéwntzigisten, unnserer reiche des rómischen im neúndten und des húngrischen im fúnfften iarnn.||
||
Commissio domini regis in consilio.||
||
Rogenndorff||
Rottaler||
R(egistra)ta||
R(egistra)ta per me Oswald Héring