Fridreich von gots gnaden Roemischer kunig zuallenzeiten merer des Reichs Hertzog zu Oesterreich und zu Steir etc. Erbern weisen und lieben getrewen. Als Ir in dem nagstvergangen herbst, unsern lieben andechtigen, Petern Humel mit einem altar in sannd Stephans kirchen ewr lehenschafft, durch unsern willen und uns zugevallen furgesehen habt, das uns von euch pillich zu dannkch kumbt. Also hat uns derselb Peter, der sich in aigner person yetz zu euch fuegt, zu erkennen geben, wie Ir seinem anwalt, in solicher fuersehung des benanten altars geanttwurtt habt, wie Ir Im denselben altar verleihen wolt. In solichermazz daz er ynner jarsfrist zu ew komen und sich zu Briesterlicher wirdikeit solte weihen lassen, damit er denselben altar selbs moecht verwesen, und wan sich aber der benant Peter in des Erwirdigen Fridreichs Ertzbischoven zu Saltzburg unsers fuersten und lieben andêchtigen diensten also verphlicht hat, daz er solichs ewrs willens und begerns so kuertzlich und fueglich nicht bekomen mag. Begern wir an ew mit sunderm fleiss und ernst, daz Ir denselben Petern solicher maynung so Ir von Im haben wellet, und als oben gemelt ist, durch unsern willen yetz begebet. Nach dem und den benanten altar kain selsorg beruert, und sich auch der benant Peter willigen erbewtet, denselben altar mit messen und andern geistlichen zugehoerungen ordenlich zu versorgen. Und wir hoffen Ir werdet In euch also darInne umb unsern willen lassen bevolhen sein, als wir getrawn. Das kumbt uns von ew gar zu guetem dannkch und gevallen. Geben zu Grêtz an Eritag vor Sannd Andres tag. Anno etc. XLIII°. Unsers Reichs im vierden Jare. com(missi)o domini Regis per Wolfgangum Ungnad camerarium.

Source Fulltext: Peter Peusquens