Wir Fridreich etc. embieten . . allen und ieglichen unsern prela^etten den vom adl stetten und merckhten auch unsern und annder lewtten und hollden in dem viertail ob des Wiennerwalds gesessen und wonhafften, wes lewt oder hollden die sein, den der brieve gezaigt oder verkundet wirdet, unnser gnad und alles gut. Als die veindt ain fu^ernemen gehabt haben durch den Wiennerwald ze ziehen und lannd und lewt daselbs zu huldigen und zu beschedigen, dem aber furzekomen haben wir unsern getrewen Jorgen von Pottenndorff,¹ obristen schennckhen in Osterreich, geordennt und bevolhen sich wider die veindt zu velld zu slahen und den veindten das raisen zu weren und widerstannd zu tu^en, das er dann also tan, sich gen Walterstorff in velld geslagen und uns zuempoten hat, das noch wenig volckh vom lannd ausserhalb unnser diennstlewt zu in cho^emen und in fu^ersorg sey, wo im die unsern nicht furderlich zuziehen, er mocht aus dem velld gedrungen werden, das uns schimphlich wêre und gen den veindten ain merklichen nachtail prêcht. Davon so bevelhen wir ew ernstlich und wellen, das ir unnser prela^etten, die von stetten mêrckten und auf dem lannd gesessen die ewren zu rossen und zu fuessen, auf das maist und sterckist ir mu^egt, mit harnasch wêr wegen und in annder weg, als in velld gehort, zugericht an alles vercziehen zu demselben von Pottendorff in velld schicket und ir die vom adl ew mit ewren dienern und lewten auch, auf das maisst und sterkhist ir mu^egt, zu rossen und zu fussen mit harnasch wer wêgen und in annder weg, als in velld gehort, zugericht zu dem benanten von Pottendorff in veld fuget und hellfet den veindten widerstannd ze tu^en und das raisen und beschedigung des lannds ze weren und ew darinn nichts sawmen noch irren lasset noch beÿ verliesung ewer leben und freihait annders tu^et, nachdem ir und annder unser lanndlewt uns auf den nagstgehallden lanndtag hie zugesagt habt uns ain anczall volckh wider die veindt zu hallden und darzu, so wir ew aufervordern aufzusein und gen veld zu ziehen, solhem ewrem zusagen ir dann pillich nachkomet. So wellen wir etc. Geben zu Wienn an suntag vor unnser lieben frawentag assumptionis anno domini etc. LXXX, unnsers kaisertumbs im newnundzwaintzigisten jar.

Source Fulltext: FUCHS, Göttweig III (=FRA II/55, Wien 1902) S. 157-158