Hec est conuentio facta inter Willelmum preceptorem et fratres domus hospitalis sancti Wolstani ex una parte et Ricardum de Helewyz ex altera uidelicet quod dictus Ricardus tradidit et impignorauit predictis Willelmo et fratribus quandam partem terre sue in uilla de Chadelewyz totam illam scilicet partem que uocatur Gonnilldefeld et duos solidos annui redditus quos Aliuredus de la Diuitate solebat reddere dicto Ricardo pro quadam particula terre que iacet inter domum dicti Aluuredi et Gonnyldefeld Adhuc etiam tradidit dictus Ricardus et impignorauit eisdem preceptori et fratribus Thomam de la Duzate cum redditu sex solidorum et quatuor denariorum et obuli annuatim fratribus predictis a dicto Thoma percipiendorum cum omni seruitio et achetis pertinentibus ad tantam terram pro qua soluti predicti sex solidi et iiii denarii et obulum ex quibus predicti preceptor et fratres soluent dicto Ricardo annuatim quatuor denarios in festo annuntiationis beate Marie Concessit etiam dictus Ricardus pro se et heredibus suis totam illam partem terre que uocatur Gonnyldefeld et duos solidos supranominatos et Thomam de la Duzate cum redditu sex solidorum iiii denariorum et obuli et omnimodo seruitio et achetis ut superius dictus est usque ad terminum sex annorum proximorum sequentorum completum Ita uidelicet quod si dictus Ricardus dictam terram et redditum nominatum in fine predictorum sex annorum non adquietauerit tota terra nominata cum redditu dicto domui hospitalis et fratribus absque aliqua contradictione uel clameo dicti Ricardi uel heredum suorum remaneant imperpetuum Dictus uero Ricardus et heredes sui predictam terram cum redditu supradicto et homine usque ad terminum predictum contra omnes homines et feminas predictis preceptori et fratribus warantizabunt defendent et in omnibus acquietabunt Quod si non fecerint concessit dictus Ricardus pro se et heredibus suis quod predicti preceptor et fratres possint predictum Ricardum et heredes suos per terram redditum et omnes possessiones suas ubicumque fuerint absque aliqua cauillatione contradictione seu inprecatione ecclesiastica uel ciuili ad hoc faciendum distringere Istam autem conuentionem fideliter et absque omni fraude et dolo obseruandam sepedicti preceptor et fratres et Ricardus fidemedia se ad inuicem obligauerunt Pro hac autem traditione et inpignoratione dederunt predicti preceptor et fratres dicto Roberto ad urgens negotium suum quatuordecim marcas argenti In cuius rei testimonium tam dicti preceptor et fratres quam dictus Ricardus alternatim sigilla sua huic scripto apposuerunt Hiis testibus Waltero de Mumron Willelmo le Norreis Serlone forestario Willelmo de Bukden Osberto de Wychwod et aliis Actum die sancte Lutie uirginis anno domini millesimo cc quinquagesimo secundo et anno regni regis Henrici filii regis Iohannis tricesimo septimo

Source Fulltext: Beauchamp Cartulary, 1100-1268. E. Mason. Pipe Roll Society, New Series V.43. Pipe Roll Society. J. W. Ruddock. Lincoln. 1980.