Omnibus fidelibus hoc scriptum uisuris Henricus filius Willelmi de Wermele salutem sciatis me pro salute mea et antecessorum meorum et heredum meorum concessisse et dedisse et presenti carta mea confirmasse deo et ecclesie Sancte Crucis de Waltham et canonicis regularibus ibidem deo seruientibus in puram et perpetuam elemosinam unam placeam terre in curia mea de Wermele uersus austrum habentem novem perticatas in longitudine a chemino uersus orientem et tres perticatas in latitudine iuxta cheminum et duas perticatas in latitudine in capite orientali simul cum toto fontinio in predicta placea scaturiente Et cum plena et perpetua libertate claudendi predictam placeam et ducendi ipsum fontem suum per medium totius terre mee ad sacramentum altarium ecclesie sue et ad alios usus necessarios domus sue et quocumque uoluerint salua michi et heredibus meis ad usus nostros necessarios quadam portione aque emanantis de conductu eorum Concessi etiam et dedi eis liberam et perpetuam potestatem et facultatem omnimodam ponendi conductum suum et positum emendandi seu renouandi quandocumque et ubicumque super terram meam predictam cultam uel incultam eis placuerit sine omni contradictione mei et heredum meorum saluo michi et heredibus meis per uisum quatuor legalium uirorum de uineto semine meo seu fructu de semine prouenturo si quid forte nobis inde occasione emendationis conductus sui deperire contigerit Hanc autem concessionem et donationem meam stabilem inperpetuum et ratam fore affidaui et ad hanc elemosinam nostram dictis canonicis integre et fideliter conseruandam et contra omnes homines et feminas warantizandam tam me quam heredes meos presentis carte mee testimonio obligaui Eiusdem nichilominus carte perpetua firmitate heredes meos mecum uolens astringi ne qua unquam occasione uel euentu quicquam impedimenti in terram meam facere uel in aliquo alio machinari possimus quo minus dicti canonici conductum fontis sui ponere et pro uoto suo emendare possint et cum omni libertate possideant et pace perhenni Et ut hec mea donatio plenam et perpetuam per omnia obtineat firmitatem ad instantiam tam predictorum canonicorum quam meam dominus Cantuariensis et dominus Londoniensis excommunicauerunt omnes eos qui eam infirmare uel aliquo modo perturbare presument Hiis testibus Bartholomeo de Reddam et cetera

Source Fulltext: Early Charters of Waltham Abbey. Rosalind Ransford. Studies in the History of Medieval Religion, V.2. Boydell Press. Woodbridge, Suffolk, Wolfeboro, N. H., USA. 1989.