Wir Hainrich der elter vnd Hainrich der Jung Vetern von Schowenberch veriehn an dem prief vor allen den, die in horent lesen oder sehent, daz wir mit dem edeln manne herrn Chunrat von Chappelle sein vberain chomen eins widerwehsels also, wir haben im vfgeben die hueb vf dem Perge pei dem hof datz Raeut in Ebelsperger pfarre vnd swaz wir datz Owe vnd ze vruar haben versuhte vnd vnversuhte, daz anher sein Lehen von vns gewesen ist vnd daz vnser Lehen ist gewesen von dem gotshavs von Pazzow. Wir haben vns ouch dez vorgenanten gutes verzigen also, daz der vorgenant her Chunrat von chappell, dem ez vnser genediger herre Bischof Wernhart von Pazzow nach vnser pet hat gelihen zerehtem Lehen, damit begen sol gegen dem gotshaus von Pazzow frilichen sinen willen an allen irrsal. So hat vns der vorgenant Chappeller her wieder vfgeben den hof ze Raeut, den Hainrich vnd Chunrat dez Ammannes sun von Harthaim von im heten, vnd die hueb ze Inn, die Maerkel von der Aschah von im het, vnd ein Lehen in der Lengenaw pei Lichtenwinchel, daz ein schuster von im het, vnd div gut pei Hartperch, div her vlrich von Weidenhotz von im het, vnd daz selb gut hat vns der vorgenant vnser herre pischof Wernhart von Pazzow nach hern Chunrats pet von Chappelle gelihen zerehtem Lehen vnd haben wir ez dem selben hern Chunrat von Chappelle gelihen zerehtem Lehen. Des sint gezeuge: Graf Hainrich von Leonberch, her Stephan von Meyssaw, her Ott von Zelking, her Hainrich von volchenstorf, her hainrich von Lonstorf, Ditmar von Aistershaim, Rudolf Schiver, Aspein von Hage, Sighart von Grube vnd ander warhaft Leute. Daz ist geschehn ze Schounberch do von Christes gepurt warn drevzehnhundert Jar vnd darnach in dem ahten Jar an sand Mathes tage an vnser chinde hohzit. vnd daz daruber forbaz dehain chrig werde, geben wir den prief versigelten mit vnsers herren bischof Wernhartz von Pazzow Insigel vnd mit vns-ser peider Insigel vnd mit hern Chunrats Insigel von Chappelle ze einer rehten(?) vrchunde.