Nos frater Rudgerus dei gratia ecclesie Boznsis (sic) episcopus ordinis Cysterciensis vniuersis sancte matris ecclesie filiis, ad quos presentes peruenerint salutem in eo, qui est vera salus omnium beatorum. - Cupientes quoslibet fidei katholice prosecutores ad pietatis opera et deuotarum orationum studia indulgenciis ac peccatorum remissionibus sollereius inuitare, omnibus vere penitentibus confessis et contritis, qui ad monasterium beate et gloriose virginis Marie in Altovado ordinis Cysterciensis Pragensis dyocesis, in natiuitate domini in epyphania in pascha in ascensione domini in pentecoste et in omnibus festis sanctissime dei genitricis Marie et omnium apostolorum et in die sancti Johannis baptiste et omnium sanctorum et in dedicacionis anniuersario et in octauis omnium predictorum festorum, gratia deuotarum precum humiliter confluxerint, seu ad edificacionem prefati monasterii manum porrexerint adiutricem, de omnipotentis dei misericordia et beatorum apostolorum Petri et Pauli auctoritate confisi quadraginta dies criminalium et centum venialium de quolibet quatuor altarium, que manu propria domino adiuuante consecrauimus, de iniuncta sibi penitencia in Christo misericorditer relaxamus. - Datum in Altovado anno domini M^o CCC^o V^o, in octaua pentecostes; presentibus in perpetuum infallibiliter valituris.

Source Fulltext: PANGERL, Stift Hohenfurth (=FRA II/23, Wien 1865) S. 61-62