Ich^a Hans Rastli der metzger burger ze sant Gallen tun kunt vnd vergich offenlich mit disem||
brief allen, die in sehent oder horent lesen, daz ich willeklich vnd vnbezwungenlich offenlich||
gesworn han ainen gelerten aide liplich zu got vnd ze den hailigen mit vf gehabenen||
vingern, war daz ich ietz oder hie nach iemer dehain stoss oder zuspruch hetti oder gewunni zu den burgern gemainlich der statt ze sant Gallen oder zu dehainem burger ald burgerinen besunder ze sant Gallen, es sien man oder frowen knaben oder tohtren, su sien ietz da selbs burger oder die hie nach da selbs burger werdent, darumb sol ich oder min gewissi botschaft an miner statt von in reht nemen ze sant Gallen in der statt vor irem geriht vnd niendert anderswa ân geuarde vnd ân alle widerrede, es war dann, das ich oder min botschaft rehtlos da selbs gelassen wurdint vnd das och daz da kuntlich wurdi, so ist mir behalten vnd in dem aid vss gelassen, daz ich daz reht ie danne, von dem ich oder min botschaft an miner statt rehtlos gelassen werdint, anderswa suchen sol vnd mag, da es dann billich vnd muglich ist, ân alle geuarde. Vnd des ze warem vrkunde so han ich Hans Rastli da vorgenant erbetten den wolbeschaidenn Hainrich Swander och burger ze sant Gallen, daz er sin insigel fur mich gehenkt hat an disen brief, vnder des insigel ich mich in diser sach willeklich^b gebunden han, won ich aigens insigels niht han, des och ich obgenanter Hainrich Swander mir vnd minen erben ân schaden vergich an disen brief. Der geben ist ze sant Gallen an dem nahsten fritag vor sant Thomas tag des zwelfbotten vor wihennahten in dem jar, do man zalt von Cristus geburt vierzehenhundert jar vnd darnach in dem ainloften jar.