Ich^a Peterman Prandis genamt Brûnberg vnd ich Susanna von Hof||
sin elichi wirtinn tun kund offenbar mit disem brief, als wir habent||
von den ersamen wîsen dem burgermaister vnd rât vnd von gmainer statt||
ze sant Gallen zehen pfund pfenning libgedinges, das vns da dieselben der burgermaister vnd rât bezalt hand die zehen pfund pfenning, so si vns pflihtig vnd veruallen wâren uff sant Martins tag nv nahst verrukt vor datum diss briefs, vnd darumb so sagen vnd lassen wir fur vns vnd fur alle vnser erben den burgermaister die rat vnd gemainlich alle burger ze sant Gallen vnd alle ir erben vnd nachkomen vnd dieselben statt ze sant Gallen vmb dieselben zehen pfund pfenning lipgedinges, die vns uff den egeseiten sant Martins tag veruallen warent vnd bezalt sind, quitt ledig vnd los nv vnd hernach mit krafft diss briefs, den wir heruber ze vrkund versigelten haben gegeben fur vns vnd alle vnser erben vnser ietweders mit sinselbes aignem anhangenden insigel. Geben ze sant Gallen an sant Katherinen abent im jar, do man zalt von Crists geburt vierzehenhundert jar vnd darnach im ainlofften jare.