Wir diss nachgenempten Johans Geffeller vnd Hainrich Bruder, den man nempt Haderli, baid lantlut ze Appenzell¹ tund kund allen den, die||
dissen brief ansechent oder horent lesen, alz vns die erbern wisen der amman vnd gemain lantlut ze Appenzell in fangnus hant geLhept von etwz zugs wegen, dar vmb die von Arbon² vnd die von sant Gallen ir botschaft hatten ze Appenzell³ vber vns, dz sich, ob got wil, niemer||
erfinden soll mit wârhait, da hant wir obgenanten Johans Gefeller vnd Hainrich Haderli vertrost vnd verburgot, vns vsser der obgenanten vanknus gen dem amman vnd gemainen lantluten ze Appenzell mit den worten vnd artikeln, alz hie nach geschriben ist. Item des ersten so hant wir vnsern guten frund Cristan Bruder erbetten, das der hinder vns ist gangen vnd vns vsser fangnus gewunnen hât, vnd hât fur vns gelopt ze gebin zwen vnd sechszig schilt ffranken, also war dz jeman kam, wer der war, stett oder herren, der vns zusprechen welt vmb die zug, alz die obgenanten stett ir botschaft getân hatten gen Appenzell oder die obgenanten von Appenzell vns oder vnsern burgen mit botten oder mit brieffen, dz wir vns denn antwurten sond vnd wend in ir gericht ze Appenzell vnd fur ir rat vnd da dem rechten warten vnd gnug tun mit lib vnd gut vntz von hut disen tag hin, alz dir brief geben ist, vber fier gantz wochen vs, die denn schierost nach an ander koment, vnd war dz wir das nut entatin vnd also abschwaif vnd bruchig wurdin, dz got wend, so sol der obgenant vnser burg Cristan Bruder die vorgedâchten zwen vnd sechszig schilt veruallen sin vnd den obgenanten lantluten ze Appenzell denn dannenhin antwurten, wenn si des nut mer enbern wend, ân allen ir schaden bi den truwen vnd aiden, so er denn dar vmb gelopt vnd geschworn hât. Ôch hât er furbz fur vns gelopt vnd verburgot die zerung vnd kost, die in der gefangenschaft vber vns gangen vnd geloffen ist, es si von zerung vnd von knecht lôn, die vnser huten, vntz vf der obgenanten lantlut ze Appenzell gnâd vnd vf ir erkantnus. Item hier vmb so hant wir obgenanten Hans Geffeller vnd Hainrich Haderli gelopt vnd gesworn gen got vnd zu den hailgen gelert aid mit vfgebotten finger, dem gnug ze tun, alz da vor geschriben ist, vnd den lantluten ze Appenzell in dir sach gehorsam ze sin vnd vnsern burgen von schaden ze losin, och hant wir furbz in den selben aid genomen, war das die obgenanten lantlut dunkti die obgenanten trostung ze krank, dz si me oder minder weltin vnd die sachen furbz verhandlen, da bi sond wir ôch beliben vnd in gehorsam ze sin vnd ôch vnser obgenanter burg mit vns in dem zit, alz da obgeschriben ist, wenn si vns dar vmb ermanent, es si vber kurtz oder vber lang. Och hant wir furbz in den selben aid genomen vnd gesworn vrfechi vnd vsser denen obgenanten sachen, alz wir in zigen soltin sin, nut ze tun, dz jemen schaden bringen mug, denn mit der obgenanten lantluten ze Appenzell wissen vnd willen vnd besunder ir erlobung. Och vergich ich der obgenant Cristan Bruder der vorgedâchten burgschaft vnd trostung, alz ich hinder die obgenanten Gefeller vnd Haderli gangen bin, dem gnug ze tun, alz dir brief wist. Darvmb so han ich den obgenanten lantluten ze Appenzell gelopt vnd gesworn ze den hailgen vnd in dar vmb gehorsam ze sin, wenn si mich dar vmb ermanent mit botten oder mit briefen. Vnd des ze offnem warem vrkunt vnd statter sicherait aller dir vorgeschribner ding vnd vergicht so hant wir all try Cristan Bruder, Hans Geffeller vnd Hainrich Haderli gebetten den ffromen wisen beschaiden Hainrichen Popphart zu disen zitten waibel ze Appenzell, dz er sin aigen insigel offenlich gehenkt hât an disen brief fur vns, won wir aigner insigel nut hant, dar vnder wir vns all try vestenklich verbinden in dir obgeschribner sach, des ôch ich der selb waibel vergich an disem brief, doch mir selb vnd minen erben ân schaden. Geben ze Appenzell am nachsten sunnentag nach sant Marcus tag des hochen himelfursten in dem jar, do man zalt von gotz geburt ffierzechen hundert jâr vnd dar nach in dem ainlifften jâr.