Wir^a graff Friderich von Toggenburg¹ graff vnd her ze Brettengow² vnd ze Thafaus³ tund kunt vnd vergehent||
offenlich mit disem brieff, dz fur vns kam des tags, alz dirr brieff geben ist, der beschaiden Cunrat Egli Ital||
Eglis salgen elicher sun burger ze Costentz vnd offnott vor vns, wie dz er vnd sin bruder Hans Cunrat||
Egli hetten den zechenden ze Wiler⁴ vnd dz gut ze Hardern⁵ gelegen, dz vor ziten Egli Seltenbach buwt, die inen der selb ir vatter salig verlassen hab vnd die von vns lehen sint vnd die wir vormals in och gelihenn habent in rechter gemaind wis ze habenn vnd ze niessen nach der brieff lut vnd sag, die wir inen daruber besigelt geben habent, die och vor vns verlesen wurdenn, vnd batt vns der selb Cunrat Egli demuttklich, dz wir die selben guter den zechenden ze Wiler vnd dz gut ze Hardern lichen wolten im vnd dem selben sinem bruder Hans Cunratten Eglin inen baiden in rechter gemaind wis ze habenn vnd ze niessenn, der bett wir in gewert haben, won vns dz redlich dunkt, vnd habend die selben zwai guter den zechenden ze Wiler vnd dz gut ze Hardern mit allen iren rechten vnd zugehorden gelihen dem selben Cunratten Eglin vnd Hans Cunratten Eglin sinem bruder inen baiden gemainlich ze ainem rechten vnd redlichen lehen vnd gemaind vnd was wir inen von recht daran lihen sollend vnd mugent nach landes vnd gemaind recht, also dz si die selben guter mit iren zugehorden inne haben vnd gemainlich niessen sond ane all geuard. Vnd wenn sich die elttest hand vnder in verwandolt, so sol darnach die eltest hand die selben guter von vns ald von vnsern erben vnd nachkomen enpfachen vnd sollend wir dann och lihen ane alles verziechen vnd ane all geuard, vnd habend diss lihen also gegen in getan vnd vollefurt mit allen den worten vnd mit aller krafft, so darzu hort vnd notturfftig was nach gewonhait vnd nach recht. Vnd des alles ze warem vnd offem vrkunt dir ding gebent wir obgenanter graff Friderich von Toggenburg vnser insigell an disen brieff. Der ist ze Costentz geben, do man von Cristi geburt zalt vierzzechen hundert jar, darnach in dem ainlufften jar, an dem nachsten dunstag nach ingandem mertzen in der vasten.