Ich Lenhart von Jungingen¹ vnd ich Hanns von Bodmenn² ritter veriehen offenlich mit disem briefe, das vns die erbern vnd wysen gemain rychs stette der veraynung in Swaben an den viervndzwaintzig tusent guldin, die si vnsern gnadigen herren von Osterrich schuldig sind vnd darumb si inen ainen briefe gegeben hand, sechs tusent guter vnd rechtgewegner Rinischer guldin vff hivt den tage, als dirre briefe geben ist, gentzlichen gewert vnd bezalt hand, vnd die ouch wir an des von Toggenburg³ schulde gegeben haben, darummb so sagen wir die egenanten rychstette vnd alle ir nachkomen der egenanten sechs tusent guldin an den egenanten vier vnd zwaintzig tusent guldin fur die egenanten vnser gnadigen herren von Osterrich vnd ouch vns vnd fur alle ir vnd vnser erben allerding quitt ledig vnd lose gentzlich vnd gar. Mitt vrkunde ditz briefs, daran wir vnsre aigne insigel offenlich gehenket haben. Der geben ist an menntag nach sant Francissen tag nach Cristus geburte vierzechen hundert jâre vnd darnach in dem zechenden jâre.