Ich^a Johans Winvelder von Byschoffzell¹, den man nemet Bissinsror, vergich vnd tun kunt offenlich an disem||
brief allen den, die in ansehent oder horent lesen, als mich die erbern kneht Rudi Bachwiler, Cristan||
Kapffman, Hansen Waltis sun der Karer von dem Odenhof² vnd ander iro mitgesellen gehaymot vnd geLvangen gen sant Gallen gefurt hant vnd mich aber die ersamen wysen der burgermaister vnd der rât ze sant Gallen vsser den selben banden vnd vanknust gelassen hant, han ich mit guter vorbetrahtunge vnd mit wolbedahtem mute vngebunden vnd gevangen^b gesworn ainen ayde mit gelerten worten liplich ze got vnd ze den hailgen mit vfgehabnen vingern, die selben vanknust strâff vnd getât niemer ze andent noch ze aferrent noch nieman von minen wegen vnd die selben den burgermaister den rât vnd die burger gemainlich noch sunderlich der vorgedahten statt ze sant Gallen die vorgenanten Rudin Bachwiler, Cristan Kapffman, Hansen Waltis sun, den Karrer vnd ander iro gesellen vnd mit namen alle, die an der selben miner vanknust strâff vnd getât schuld gehebt hant, niemer anzesprechent ze bekumberrent noch in kain wis ze beswarrent weder mit gaistlichem noch weltlichem geriht noch ân geriht mit worten noch mit werken noch mit dehainen andren sachen ân alle geuerde. Ich han ôch in den selben ayde genomen vnd gesworn, hetti ald gewunn ich mit den selben dem burgermaister dem rât oder burgern ald burgerinen der obgedahten statt ze sant Gallen gemainlich ald sunderlich iht ze sprechent, dz ich das reht von inen ervordren vnd nemen sol vor dem rât oder iro statt geriht, es wari denn, das ich von ieman rehtlos gelâssen wurd, so mag ich dannenhin min reht suchen vnd nemen, wa mir daz fugklich ist. Ich han ôch in den selben ayde genomen vnd gesworn, wider die obgedahten den burgermaister den rât noch die burger der selben statt ze sant Gallen niemer ze koment noch ze sind in kain wis vnd vngeuarlich. Vnd ze offemm wârem vrkund vnd gantzer sicherhait aller hieuorgeschribnen dinge vnd vergicht so han ich der selbe Iohans Winvelder erbetten, won ich nit aigens insigels hân, den frômen vesten Johansen von Ainwille³, das er sin insigel fur mich an disen brief gehenkt hat, des ich der selbe Johans von Ainwille offenlich an disem brief vergich mir vnd minen erben ân schaden. Geben ze sant Gallen an sant Ambrosius tag in dem aberellen in dem jare, do man zalt von Cristus geburt vierzehenhundert jar, darnach in dem zehenden jare.