Wir^a der schulthaizz vnd der râte vnd die burger gemainlich der statt ze Wil¹ im Thurgow veriehent||
offenlich vnd tund kunt allermenglichem mit disem brief fur vns vnd fur alle vnser nachkomen,||
als da angesehen ist von gebresten wegen der armen luten der sundersiechen am veld vor||
vnser statt vss gelegen gotzdienst vnd der messe, so sy vntz har da lang zit geierret vnd gemangelt hant, daz wir douch durch got voran vnd vnser vnd vnser nachkomen selan hails willen vnd denselben sundersiechen vnd iro nachkomen zu ainer komliche vnd furdernust daz gern vfen woltent, ob wir da gunst vnd willen hettint vnsers gnedigen herren abt Cunen von gotz gnaden des gotzhus ze sant Gallen² vnd aines lutpriesters ze Wil an siner statt, darvmb wir mit fliss ernstlich gebetten habint vnsern obgenanten gnedigen herren von sant Gallen vnd her Hansen den Fuchs von Ehingen³ zu denselben ziten camrer vnd lutpriester ze Wil, die vnser ernstlich bett angesehen vnd erhort hant vnd ouch voran durch got vergunstet vnd erlobt hant mit gedingde, als hienach geschriben stat. Also wie daz ietz ald hernach kam, daz merer gotzdienst gestifft daselbs geordnot vnd gemacht wurde, daz daz gentzlich vnserm obgenanten herren von sant Gallen vnd sinen nachkomen vnd dem obgenanten gotzhus vnd siner kilchen sant Peter ze Wil⁴ vnd ainem lutpriester derselben kilchen vnschadlich geschehen sol ietz vnd hernach, als ander pfrunden vnd stifften ze Wil ouch geordnot vnd gemacht sind nach lut vnd sag der brief vnser frowen vnd der frumess altâr in sant Niclaus⁵ kilchen ze Wil vngeuarlich. Geben an mitwochen vor sant Mathtyas tag des hailigen zwelffbotten vnder der statt ze Wil insigel fur vns vnd vnser nachkomen in dem jar, do man zalt von Cristi geburt vierzehenhundert jar vnd darnach in dem zehenden jar etc. etc. H.W. etc. etc.