Ich^a Hans Rudger der weber burger ze sant Gallen tun kunt vnd vergich offenlich mit disem brief allen, die in sehent oder horent lesen, daz ich mit||
wolbedahtem mut willeklich vnd vnbezwungenlich offenlich gesworn han liplich ze got vnd ze den hailigen mit vfgehabenen vingern, war||
daz ich ietz dehain zu spruch hetti oder hie nach iemer gewunni zu dehainem burger ald burgerinen der statt ze sant Gallen, su sien ietz da selbs||
burger ald si werdent noch burger da selbs, oder zu gemainer statt vnd burgern ze sant Gallen, daz ich danne von in reht nemen sol vnd wil ze sant Gallen in der statt vor irem geriht vnd niedert anderswa won nach der selben statt ze sant Gallen reht vnd gewonhait, ez war danne, das ich oder min gewisser bott an miner statt rehtlos gelassen wurdint, daz ich danne den oder die, von dem ich oder min bott da selbs rehtlos gelassen werdent, anderswa reht suchen sol vnd mag, da es danne billich vnd muglich ist, ân geuarde, daz mir in minem aide vssgelassen vnd behalten ist. Vnd des alles ze offem warem vrkunde guter zugnuss vnd stater sicherhait aller der vorgeschribenn dinge vnd vergiht so han ich Hans Rudger da vorgenant erbetten den ersamen Hansen von Watt¹ vnd Hainrich Mertzen och burger ze sant Gallen, daz su baid iru insigel fur mich gehenkt hant an disen brief, vnder dero insigel ich mich in diser sache willeklich gebunden han, won ich aigens insigels niht han, des och wir die obgenanten Hans von Watt vnd Hainrich Mertz vns vnd vnseren erben ân schaden veriehen an disem brief. Der geben ist ze sant Gallen an dem nahsten donstag vor sant Andres tag des zwelfbotten in dem jar, do man zalt von Cristus geburt vierzehenhundert jar vnd darnach in dem nunden jare.