Wir^a frôw Kungung von Montfart graffenne geborn von Toggenburg¹ grauff Wilhelms von Montfart herren ze Pregentz² eliche frow bekennent offenlich||
vnd tund kunt allermenglichem mit disem brief fur vns vnd fur vnsern ietzgenanten herren vnd elichen wirt vnd fur vnser vnd sin erben vnd nachkomen, daz||
wir den fromen knecht Cunraten Maiger vsser dem Thurtal³, den man nempt Thurtailer, der vns von aigenschafft sins libs zugehort, mit lib||
vnd mit allem sinem gut vnd mit allem dem, so von im iemermer komen oder geborn mocht werden, gantzlich vnd gar dem erwirdigen abt Johansen von gotz verhengnust des gotzhus ze Vischinen⁴ sant Benedicten ordens in Costentzer bistum gelegen vnd demselben sinem gotzhus vnd allen sinen nachkomen geben vnd gewechselt habint vmb den erbern knecht Rudin Jaklis ietz vnsern keller ze Spiegelberg⁵ wilent Hansen Jaklis seligen elichen sun von Eschlikon⁶, also daz vns vnd vnsern erben vnd nachkomen nû hinnenthin der selb Rudi Jaklis vnd alle sine kind^b vnd alles, so von im geborn mag werden, zugehoren sol an alle sumnust vnd ierrtag des obgenanten abt Johansen vnd aller siner nachkomen, vnd vmb daz, daz derselb Cunrat Maiger vnd alle sin nachkomen vnd alle sine kind, er habe die ietzo oder er gewinne kind hernach, demselben ietzgenanten gotzhus ze Vischinen nû hinnanthin ewklich fridlich vnd ruwklich beliben vnd dienen mugent. Dar vmb so sagent wir denselben Cunraten Maiger vnd alle sine kind vnd alle sin nachkomen fur vns fur den obgenanten vnsern elichen wirt vnd fur alle vnser vnd sin erben vnd nachkomen gantzlich quidt ledig vnd los mit disem brief aller dienst vall vnd gelazz, so sy vns oder vnsern nachkomen getun kondent vnd so vns vnd allen vnsern nachkomen von inen iemermer werden mocht in dehain wis^c ald weg an all geuard. Vnd ist dis alles geschehen mit aller gewarsami worten vnd werken, so dar zu von recht vnd von gewonhait gehorten vnd nutz vnd noturfftig warent vnd als daz billich nach recht kraft vnd macht hat vnd haben sol nû vnd hernach. Mit vrkund dis briefs, der mit vnserm anhangendem insigel versigelter geben ist ze Spiegelberg vff vnser vestin in dem jar, do man zalt nach der geburt Cristi vierzehenhundert jar vnd darnach in dem nunden jare, an mentag nechst vor sant Michels tag.