Ich^a Egli von Rosenberg gesessen ze Bernang¹ im Rintal veriech manglichem fur mich fur alle min erben vnd||
nachkomen mit disem brief, daz ich mit wolbedachtem sinn vnd mut mit guter vorbetrachtung disu nachgeLscribenen guter, die min lehen gewesen sind von dem erwirdigen gotzhus ze sant Gallen, daz ist die wise gelegen||
im Widach² ze Diepoltzow³, die man nempt Stokklerin, vnd den akker bi der selben wise gelegen vnd an die selben wise stosset, vnd die ergerden och da selbs gelegen vornan im Widach, stosset an Hannis an der Gassen gut von Diepoltzow, mit grund mit grat mit wunn mit waid mit stegen mit wegen mit allen rechten nutzzen gewonhaiten vnd zu gehorden, so von recht ald von gewonhait zu den selben gutern ald darin gehorent, ains rechten redlichen koffs verkofft vnd gib si ze koffen mit disem brief zwen tail der selben guter dem vorgenanten Hannin an der Gassen vnd den dritten tail der selben guter Annen an der Gassen des selben Hannis an der Gassen elich tochter vnd iren erben vmb ainlif phunt guter vnd genamer phenning Costentzer muns, der selben phenning zwen tail ich von dem selben Hannin an der Gassen vnd den dritten tail von der selben Annen an der Gassen gantzlich vnd gar nach allem minem frumen vnd nutz gewert vnd bezalt bin vnd an minen guten nutz bewent vnd bekert han, vnd han der selben guter zwen tail dem vorbenempten Hannin an der Gassen vnd den dritten tail der egenanten Annen an der Gassen von dem vorgenanten gotzhus ze sant Gallen geuertgot vnd in iro vnd iro erben handen vnd gewalt pracht, wie recht sitt vnd gewonlich waz vnd wie es kraft vnd macht sol vnd mag han nu vnd hienach, vnd han mich verzigen vnd verzich mich mit disem brief fur mich vnd fur all min erben vnd nachkomen gen den vorbenempten Hannin an der Gassen vnd Annen an der Gassen siner tochter vnd gen iro erben aller der recht vnd rechtung vordrung vnd ansprach aller aigenschaft lehenschaft kuntschaft aller gewer lut vnd brief alles gaistliches vnd weltliches gerichtes vnd rechtes, so ich dehain min erben vnd nachkomen an den zu den vnd von der vorgescribner guter mit aller ir zu gehorde wegen ie gehept hand ald hienach iemer gehaben oder gewinnen mochtint, vnd daz ich noch dehain min erben noch nachkomen noch niemand andre an vnser stat noch von vnser wegen die vorbenempten Hannin an der Gassen vnd sin erben von zwain tailn vnd Annen an der Gassen vnd ir erben von dem dritten tail der vorgenanten guter wegen niemer me sollent noch mugent ansprechen vfftriben bekumberen bekrenken noch in dehain wise beswaren weder mit gaistlichem noch mit weltlichem gericht noch ân gericht noch mit dehainerlay andrer sach noch furzug vberal ân alle geuerde. Ich vnd min erben vnd nahkomen sond och bi guten truwen, alz ich fur vns verhaissen vnd gelopt han, des vorgenanten Hannis an der Gassen vnd siner erben vmb zwen tail vnd der obgenanten Annen an der Gassen vnd ir erben vmb den dritten tail der vorgenanten guter mit aller zugehorde vnd dis koffs recht wern sin nach des lantz recht vnd si darvmb ze versprechen vnd ze verstann ân iro schaden, wa si des bedurfent vnd noturftig werdent, ân alles verziechen ân alle geuerde. Vnd des alles ze warem vrkund vnd ewiger sicherhait so han ich obgenanter Egli von Rosenberg min insygel fur mich vnd fur min erben vnd nâhkomen offenlich gehenk an disen brief. Der geben ist am nahsten fritag vor sant Johans tag des Toffers ze sunnwenden nach Cristy geburt vierzehenhundert jar vnd im nunden jar.