Allen^a den, die disen brief sehent oder horent lesen, kund ich Eberhart Stagel schulthesz der statt Zur(ic^h1, dz fur mich kam an der stat, da ich offenlich ze gericht sas,||
fro Adelheit Metzinerin Rudolff Metziners burgers Zur(ic^h eliche wirtin mit dem selben ir elichen wirt vnd rechten vogt offenbert vor mir in gericht vnd sprach,||
sy hette den zehenden vff dem nidern hoff ze Welde² by Arbon³ gelegen wer ir vetterliche erb, den selben zehenden mit aller zu gehort alle die rechtung, so||
sy dar vff oder dar an hatt, hette sy vmb funfftzehen pfunt pfenning verkofft vnd ze koffenn geben Cunr. vnd Heinr. vnd Johansen den Blindenowern gebrudern ir bruders elichen sunen vnd wer och des selben geltz von inen gentzlich gewert vnd betzalt. Dar vmb so wolt och sy den selben knaben alle ir rechtung des vorbenemten zehenden hie vor gericht vff geben vnd wolt sich des entzichen vnd liess an recht, wie sy dz tun solt. Do wart nach miner frag von erbern luten an gemeiner vrtel erteilt, wo du obgenant Adelheit Metzinerin dar stunde vnd den egenanten knaben allen dryen den vorbenemten zehenden mit miner hand vnd mit des obgenanten ir elichen mans vnd rechten vogtes hand ledig vnd los vff gab vnd sich des entzige, dz sy dz wol tun mochte. Do daz erteilt wart, do stund die egenant Adelheit mit Rudolff Metziner ir eliche(m) man vnd rechte(m) vogt dar vnd gab da dem egenanten Cunr. vnd Heinr. den Blindenowern ir bruders sunen ze iro vnd Johansen ir beider bruders wegen den vorbenemten zehenden ze Wald vff dem nidern hoff mit aller zugehort alle die rechtung, so sy dar vff oder dar an hatt, mit miner hand vnd mit Rudolff Metziners ir elichen mans vnd rechten vogtes hand ledig vnd los vff vnd entzech sich des alles fur sich vnd ir erben och mit miner hand vnd Rudolff Metziners ir elichen mans hand in der obgenanten knaben irs bruder suns hand ze iro vnd ir erben handen wegen, als do gericht vnd vrtel gab, vnd benugt och die obgenanten Heinr. vnd Cunr. die Blindenower an der selben vertgunng fur sich vnd ir bruder och, als do vrtel gab, vnd do dis alles beschach, als mit vrtel erteilt wart, do liessen die selben Cunr. vnd Heinr. Blindenower ze ir vnd Johans ir bruder wegen an recht, ob inen dz gericht sin brief her vmb geben solt, der wart och inen nach miner frag von erbern lutten an gemeiner vrtel erteilt. Vnd her vber ze einem offenn vrkunt so han ich min insigel von des gerichtz wegen offenlich gehenkt an disen brief. Der geben ist an samstag nach sant Goryen tag nach Cristus geburt viertzeehen hundert vnd in dem nunden jar. Hie by waren Jos Kiel, Johans Brunner, Wernher Tachs, Johans Vngericht, Johans Zayg, Heinr. Brennisen, Cunr. Widmer min weibel vnd ander erber lutt.