Wir^a die houptlute der ritterschafft in Swauben, als wir vns in dem namen sant Georyen zu ainander verbunden haben, Steffan von Gundolffingen¹ fryg vnd ritter, Mark von Schellenberg² genant Ruchti, Chunrat vom Stain von Klingenstain³ des tails im||
Albgow⁴ vnd an der Tunowe⁵, Johans von Tengen⁶ fryg, Kaspar von Klingenberg⁷ vnd Burkart von Stoffeln⁸ genant Schurlli des andern tails im Hegow⁹ im Turgowe¹⁰ vnd vmb den Bodense¹¹ vnd wir div selb gesellschaft vnd ritterschafft alle gemainlich, Albrecht||
von gottes gnaden bischoff ze Costentz¹², Vlrich hertzog ze Tegg¹³, graff Hug von Montfort herre ze Pregentz¹⁴, grauf Wilhalm von Montfort ouch herre ze Pregentz¹⁵ sin vetter, grâuf Hug von Montfort komentur ze Bubikain¹⁶ graf Wilhalms bruder, grauf Eberhart von||
Nellenburg¹⁷, lantgraf in Hegow vnd im Madach¹⁸, grauf Rudolff von Montfort¹⁹ herre zer Schar²⁰, grauff Wilhalm von Montfort herre ze Tettnang²¹ gebruder, grauf Johans von Lupffen²² lantgrauf ze Stullingen²³ vnd herre ze Hohenakk²⁴, grauf Egen von Furstenberg²⁵ mit der Bar²⁶ vnd mit dem Swartzwald²⁷, Walther vnd Vlrich von Klingen²⁸ geuetteren, Hainrich vnd Johans von Rosnegg²⁹ gebruder, Wolfli von Brandis³⁰, Johans Truchsezz ze Waltpurg³¹, Johans von Bodmen der alt, Johans von Bodmen, Frisch Hans, Johans Chunrat von Bodmen³², Lienhart von Jungingen³³, Hainrich von Elrbach³⁴, Hainrich von Randegg³⁵, Cunrat von Lupffen³⁶, Herman von Friberg, Doman von Friberg³⁷, Berchtolt vom Stain³⁸, Hainrich von Isenburg³⁹, Eberhart vnd Chunrat von Landow⁴⁰ gebruder, Marquart von Schellenberg von Kislegg⁴¹, Cunrat von Schellenberg⁴², Michel von Wolkenstain⁴³, Hainrich von Horningen⁴⁴, Geory Truchsezz von Ringingen⁴⁵, Johans von Kungsegg⁴⁶, Ludwig von Hornstain⁴⁷, Johans Truchsezz von Diessenhouen genant Brakk⁴⁸, Johans von Hornstain von Schatzberg⁴⁹, Burkart von Mannsperg⁵⁰, Chunrat von Haimenhouen⁵¹, Walther vom Stain⁵², Walther vnd Hans von Stadgen⁵³, Claus von Vilibach⁵⁴, Wolff vom Stain von Clingenstain⁵⁵, Wolff vom Stain von dem Rechten Stain⁵⁶, Cunrat Berger von Opffingen⁵⁷, Hainrich Truchsezz von Hufingen⁵⁸, Hainrich Roggwiler vnd Johans Swartz alle ritter, Brvn von Lupffen⁵⁹, Doltzer vnd Hainrich von Schellenberg⁶⁰, Walther, Albrecht, Vlrich, Hans, Albrecht, Vlrich, Egg vnd Livtolt alle von Kvngsegg⁶¹, Vlrich, Herman vnd Hainrich von Hornstain⁶², Fridrich von Friberg⁶³, Wilhalm von Waldi⁶⁴, Rudolff von Fridingen⁶⁵, Cunrat von Schellenberg⁶⁶, Wernher von Hertenstain⁶⁷, Cunrat vom Stain von Elrbach⁶⁸, Cunrat vom Stain⁶⁹ genant Zah, Haintzman vom Stain⁷⁰, Hans Vlrich von Emptz⁷¹, Peter von Hohnegg⁷², Wilhalm, Hainrich vnd Wilhalm von Knoringen⁷³, Hainrich von Fridingen⁷⁴, Hainrich von Randegg, Hans von Randegg⁷⁵, Hans der elter, Hans der junger vnd Hainrich von Honburg⁷⁶, Rudolf von Landenberg⁷⁷, Hans gnant Molle, Herman vnd Bitterli die Truchsessen von Diessenhouen⁷⁸, Hans von Wildenfels⁷⁹, Vlrich von Haimenhouen⁸⁰, Hainrich von Loubenberg⁸¹, Ramsperg, Hans Bentznower, Egg, Ruf, Hans, Eberli von Rischach⁸², Wolff von Wolffurt⁸³, Burkart Maiger, Egli vnd Burkart von Randenburg⁸⁴, Cunrat von Rischach⁸⁵ der jung, Lvtz vnd Hainrich von Werdnowe⁸⁶, Stumberg von Stuben⁸⁷, Hainrich Vogt vom Livtpoltz, Rudolf⁸⁸ sin sun, Frik von Elnhouen⁸⁹, Burkart, Eberhart vnd Chunrat von Wiler⁹⁰, Bentz von Hornstain von Groningen⁹¹, Buvstetten der alt von Maisenburg⁹², Jos von Vtenriet⁹³, Hiltprant Wielli, Hans von Magenbuch⁹⁴, Hans Boss, Linsi von Adelhartzhouen⁹⁵, Hensli von Hodorf⁹⁶, Hainrich von Haggelbach⁹⁷, Hainrich von Magenbuch⁹⁸, Herman von Loubenberg⁹⁹, Herman Gramlich, Hainrich Suryg¹⁰0, Jakli Swartz vnd Rudger Hartzer bekennen vns offenlich mit disem brief, wan wir vnd die ersamen wisen der burgermaister der rate vnd die burger gemainlich der stat ze Costentz zu den ziten, do vil vnd mengerlai wilder vnlouff vnd bos gebresten in den landen vfgestanden warent, sunder von Appenzellern¹⁰1 vnd denen, die sich zu in geschlagen vnd verbunden hatten, durch die land vnd lut edel vnd vnedel herren vnd stett closter vnd ander gaistlich vnd weltlich gedrukt vnd dez iren vnmachtig gemacht vnd entsetzt wurden wider got vnd alle rechten, bedahten vnd fur vns namend, das der fursatz gotlicher wishait gebutt vnd geschribne rechten das wisten vnd seiten, daz menglich gebunden were vnd solte sin, den gemainen nutz ze furderen vnd den schaden des gemainen gutes ze wenden frid vnd gnad ze machen, vnd vns do ze mal got ze lob, dem hailigen Romischen rich ze wirde vnd zu eren fur solich bos louff vnd vnredlich gewalt vff ain zit, das sich ietzo verrukken vnd ergan wirt, vff sant Georien tag nu nechstkunftigen zu ainander verbunden nach vswisung desselben bundbrieffz, darinne wir vnd gemains lande vnd alle erber vnuersprochen lute kvntlich vnd wol gemainen nutz gemerkt vnd empfunden haben vnd vns von den gnaden gottes also gelukt hat, das wir sidmals der selben bosen vnredlichen gewalt doch ains tails entladen vnd vberhept sigen, vnd darumb vnd ouch vmb das, ob wir solich beschaiden louf vnd ordnung mit der hilf gottes hinfur in den landen beheben mochten, so haben wir gar beratenlich mit guten fursatzen vnd mit wolbedachtem synne vnd mute aber got ze lob dem hailigen Romischen rich ze wirde vnd ze eren vns vnd gemainem land ze friden vnd ze gemach vnd luterlich durch den gemainen nutz die selben vnser gesellschafft vnd aynung mit den obgenanten dem burgermaister dem rate vnd den burgern gemainlich der stat ze Costentz ernivrot gelengert vnd gestrekt hinfur von dem egenanten sant Georyen tag nechstkunftigen drv gantze iar div nechsten nach ainander in die form wise vnd mainung, als hernach mit worten vnd in geschrifft begriffen wirt, vnd doch der vordrigen aynung vntz vf den selben sant Georyen tag nechstkunftigen vnuergriffenlich vnd bi iren kreften ze beliben. Vnd also wer es sach, das die obgenanten von Costentz oder die iren, die in ze versprechen stand, von ieman, wer er were, nach dem egenanten sant Georien tag nechstkunftigen bekumbert beschadgot oder angriffen wurden widerrechtz oder das si iemand in dem zit diser verainung triben drengen oder nemen wolt von frihaiten rechten oder guten gewonhaiten, die si vnd die iren hand vnd haben herbracht von Romischen kaisern vnd kvnigen, vnd das sich darumb der oder die ains rechten von in vor vns den obgenanten hoptluten nit wolt benugen lazzen in dirre nachbenempten stette ainer Ratolffzell¹⁰2, Pfullendorff¹⁰3, Marchtorf¹⁰4, Sulgen¹⁰5, Mangen¹⁰6 oder Rudlingen¹⁰7, weli denn dem oder denen aller gelegnost ist, ane geuerde, vnd das das von in verschlagen wurde, wenne denne wir obgenanten houptlut, die ietzo sint oder noch werdent, des von den obgenanten von Costentz erindert oder ermant werdent mit botten ald brieuen ze hus ze hof ald vnder ougen, so sullen darnach wir obgenanten houptlut oder die nach vns hoptlut werdent vier erber man von gemainer gesellschaft wegen mit vollem gewalt vnd vnuerzogenlich schiken vnd senden in die egenante stat Marchdorff vff die zit, als vns denn vngeuarlich dahin verkunt wirt, vnd die egenanten von Costentz dry erber man ouch mit vollem gewalt. Die siben sont denn da an stett zu ainander sitzen vnd sich erkennen bi aid vnd bi eren, wie vnd in weler wise vnd mit was hilff wir den egenanten von Costentz vnd den iren nach gelegenhait der sach vnd nach ir notdurfft helffen oder ze statten komen sullen. Was da vnder denen das merr darvmb wirt, dem sullen denne wir andern alle bi den aiden gnug tun vnd darinne gehorsam sin vnd ouch das getrulich vnd furderlich vollestrekken vnd vollefuren vff vnser selbs kosten schaden vnd verlust aller ding, als lang vnd vntz vff die zit, bis das div sach, darumb denn gemant ist, allerding erobert gericht oder abgetragen wirt. Were ouch, das sich dazwischan gefugte, das also vt vfgieng vnd in der zit diser aynung nit gericht wurde, darinne sullen wir in nach vsgang dirre aynung dennocht beholffen sin, als vorgeschriben stat, vntz das daz gericht wirt. Wurden ouch dazwischan die obgenanten von Costentz oder die iren dehainost vberzogen, wie oder von wem ald wie dik das beschach, als bald vnd wir obgenanten houptlut vnd die gesellen alle gemainlich ald sunderlich dez denne von den egenanten von Costentz erindert oder ermant werdent mit botten ald brieuen ze hus ze hof ald vnder ougen, so sullen wir ze stund vnd vnuerzogenlich mit macht mit libe vnd gut nach vnserm vermugen vngeuarlichen den nechsten zu in ylen vnd keren vnd in darvnder vnd darinne bi den aiden hilfflich sin, also das das dehainer vnder vns vff den andern verziehen sol vnd das ouch die von Costentz die vier, als vorgeschriben stat, darvmbe zu ainander nit bedurffent manen dehains wegs. Darzu sullen wir die selben von Costentz vnd die iren ir lib vnd ir gut die zit diser veraynung in allen vnsern landen vnd gebieten frvntlich vnd gutlich halten vnd schirmen vnd ir lib vnd gut, ob ez notdurfftig wirt, ze frischer getat retten vnd weren, als dik wir dez gemainlich oder besunder von in oder den iren ermant werdent, ouch das wir si halten vnd sullen beliben lan bi allen iren frihaiten rechten vnd guten gewonhaiten, der si sich in disem brieff nit begeben hand, ane alle geuerde, korn kost koufmanschaft vnd ander ir notdurft lazzen zugan vnd in das nit sperren dehains wegs. Nu durch beliblichi vnd frvntschafft willen diser verainung sigen wir furbas mitainander vber ain komen, wer ez, das dazwischan dehain gesell in diser verainung, der ietzo darinne ist oder noch darin kompt, iht ze sprechen hett oder gewunne zu den obgenanten von Costentz oder den iren, der oder die vnder vns sond darvmb ainen gemainen nemen vss dem rate ze Costentz, den ouch si halten vnd dez wisen sond, daz er daz fug. Vff den selben gemainen vnd vff ainen gelichen zusatz sond si ir sachen komen vnd die berechten ze Costentz in der stat in vierzehen tagen den nechsten, nach dem vnd daz von dem clagenden tail erfordert wirt. Der gemain vnd der zusatz mugend ouch darinne ain minne suchen, ob in die gelangen mag mit baider tail willen, doch das si daz recht darvmb nit svmmen vnd dem in dem egenanten zit vstrag geben sond, ane alle geuerde. Es sol ouch daruf iederman sicher gut gelait han gen Costentz dar vnd dannan fur si vnd die iren ane alle geuerde. Och sol aucht vnd ban am rechten still ligen vnd da nit furgezogen werden in dehainen weg. Was ouch da mit der minne gericht oder mit vrtail vnd recht gesprochen wirt, das sol von ietwederm tail gehalten werden vnd dabi beliben ane menglichs widerrede. Doch sint darinne vsgenomen verbrieft schuldan vnlogenber gult zins vnd hubgelt, daz sol ietweder tail vnder vns gen dem andern halten, als von alter herkomen ist vnd nach ains ieglichen briefs lut vnd sag ane alle geuerde. Vnd wan, als vorgeschriben stat, die obgeschriben bosen vnredlichen gewalt von vrhab vnd dez ersten komen gewachssen vnd vfgestanden sint von Appenzellern vnd denen, die sich zu inen geschlagen vnd verbunden hatten, ob nv der selb vnlouf oder desselben vnloufs gelich von in wider vfstunde, darvmb vnd dafur haben wir vns sunderlich mit bedingde zu den egenanten von Costentz veraint vnd bi geswornen aiden verstrikt vnd verbunden, kam es darzu, wenn denne dez die obgenanten vnser houptlut, die ietzo sint oder noch werdent, von den egenanten von Costentz erindert oder darumb ermant werdent ze hus ze hof mit brieuen ald vnder ougen, so sullen wir in darnach in manods frist dem nechsten vnuerzogenlich schiken vnd senden hvndert ze ross vnd hundert ze fus gutes wolerzivgtes^b volks mit armbrusten vnd spiessen gelich gen Costentz in die stat oder in andre ire schloss, wa si der bedurffent zu taglichem krieg, vnd darzu dem selben vnserm volk ainen erbern hoptman, des wir vnd si nutz vnd ere haben vnd der den krieg reschlich vnd endlich tribe, aber vf vnsern aigen pfening kosten schaden vnd verlust aller ding. Dasselb volk vnd der houptman sond ouch den egenanten von Costentz gehorsam vnd gewartig vnd alz lang bi in oder in andern iren schlossen ligen vnd beliben, vntz daz die vorgenanten krieg stos vnd sachen gen den obgenanten Appenzellern vnd die zu in gehorent, ob die wider vsgiengen, als vorgeschriben stat, erobert gericht oder abgetragen werdent. Wurd ouch div zal desselben volks dehainost gemindrot, wie oder wie dik das beschach, so sullen wir in die allweg mit als guten wider vsrichten vnd erfollen, das es ie bi der zal vnd summe belibe vnd daran nit abgebrochen oder gemindrot werde. Ez sol ouch dasselb volk vnd der selb zusatz den vordrigen artikel von ander hilf wegen nit irren noch angan in dehainen weg. Die selben von Costentz sond ouch schaffen vnd ordnen, daz dem selben vnserm volk bi in oder in andren iren schlossen redlicher vailer kouf vmb ir gelt gegeben vnd mit den herbergen nit beschatzot werden ane geuerde. Were ouch, daz sich div sach gen den Appenzellern vnd denen, die zu in gehorten, als haftklich in zerren wurde, das den hoptman vnsers volkz vnd die von Costentz duhte vnd die obgenanten vnser hoptlut dez von den von Costentz ermant wurden mit botten ald brieuen ze hus ze hof ald vnder ougen, das man mer volkz darzu bedorfte, so sond die selben vnser houptlut von gemainer vnser gesellschafft wegen darnach vnuerzogenlich vf die zit, als in die vngeuarlich verkunt wirt, dry erber man, weli si wend, zu dem egenanten hoptman vnsers vorgenanten volkz setzen vnd geben vnd die von Costentz ouch dry erber man, weli si wend. Vnd wez sich die gemainlich ald der merrtail vnder in erkennent oder sprechent, das man mer volkz notdurftig sig, daz sullen wir in denne aber schiken vnd senden in manods frist dem nechsten nach dem vnd gesprochen wirt in allem vorgeschribnem rechten ane alle widerrede. Stund ouch div selb sach gen den Appenzellern vnd denen, die zu in gehorent, also wider vf vnd wurde nit erobert oder gericht in zit diser aynung, so sullen wir in dennocht nach vsgang dirre ainung darinne hilfflich sin in aller der wise, als vorgeschriben stat, vntz vff die zit, das div selb sach gentzlich erobert oder gericht wirt. Sich sol ouch mit namen darinne entwedra tail ane den andern nit richten noch vssunen in kainen weg. Were ouch, das wir furbas iemand mer in vnser gesellschafft namen, den oder die sullen wir den obgenanten von Costentz beschriben geben vnd schaffen, das in die sweren vnd brief geben in aller der wise, alz wir getan haben, ane geuerde. Were ouch, das wir jemant zu vns namen vswendig Swaben dem lande, das mugen wir ouch wol tun, doch diser aynung gen den von Costentz vnschadlich vnd also, das wir das an si bringen sullen, ob si die buntnus gen dem oder den selben vswendig dem land Swauben ouch halten vnd darynne sin wellen oder nit, div wal sol an in stan. Were ouch, das in disem brieff vt missschriben oder vergessen were, das sich entzwischan vnser vnd den von Costentz vnd den iren in dehain ander wise denne zu rechter frvntschafft geziehen mochte, daran sol sich entweder tail vnder vns nit keren noch sich damit wider den andern tail nit behelffen dehains wegs, vnd sullen vast ain besser getruwen zu ainander han vnd ainander bas zusehen vnd hilfflicher sin, denn man das mit worten oder mit geschrifft begriffen kvnne. Vnd also haben wir obgenanten hoptlut der ritterschafft vnd die gesellen alle gemainlich vnd ieglicher vnder vns besunder gesworn ainen aid zen hailigen mit gelerten worten vnd mit vfgebotnen vingern, dis gesellschafft bvntnus vnd aynung gen den von Costentz vnd den iren war vnd stat ze halten ze laisten vnd ze vollefuren nach dis briefz lut vnd sag, das alles ane alle geuerde vnd argenlist, doch haben wir vsgenomen vnsern gnedigen herren den Romischen kvnig das hailig Romisch rich vnd susz niemand anders ane geuerde. Dirre ding aller, so hieuorgeschriben sind, ze warem offem vrkund vnd stater sicherhait haben wir obgenanten sechs houptlut voran vnd darnach wir nachbenempten Albrecht von gottes gnaden bischoff ze Costentz, graff Eberhart von Nellenburg, graff Egen von Furstenberg, Hainrich von Rosnegg, Vlrich von Clingen, Johans Cunrat von Bodmen, Hainrich von Randegg, Hainrich Truchsezz von Diessenhouen ritter, Hans von Honburg der alt vnd Rudolff von Fridingen, Vlrich hertzog ze Tegg, graf Rudolff von Montfort herre zer Schar, Berchtolt vom Stain, Hainrich von Elrbach, Cunrat von Haimenhouen, Marquart von Schellenberg, Hans von Hornstain, Walther vom Stain ouch ritter, Walther von Kunigsegg vnd Hainrich Vogt vom Livtpoltz vnsre insigel fur vns vnd die obgeschribnen ritterschaft alle vnd die noch zu vns komend offenlich gehenkt an disen brief, vnder die selben sechs vnd zwaintzig insigel wir vns andern alle verbinden vnd willeklich gebunden haben zu ainer vergicht vnd statkait aller vorgeschribner ding, wan vnser aller insigel ze vil wurden daran ze henken. Geben ze Costentz an dornstag vor dem sunnentag Reminiscere in der vasten, do man zalt nach Cristi geburt vierzehenhundert vnd in dem nvnden jare.