Wir^a Lupolt vnd Fridrich gepruder von gots gnaden hertzogen ze Osterrich ze Styr||
ze Kernten vnd ze Krayn graufen ze Tyrol etc. embieten vnsern lieben getruwen||
allen vnsern vogten schulthaissen reten amptluten vnd vndertan in allen vnsern||
landen kraissen schlossen vnd gebieten, so wir in Curwalhen vnd vnder dem Wallensew haben, ze Froidenperg, ze Niperg, ze Sanngans vnd ze Windegg mit allen iren zugehorden vnser gnad vnd alles gut vnd tun uch ze wissend, dz wir dem edeln vnserm lieben ohaim grauf Fridrichen von Toggenpurg die vorgenanten vnser herschaften graufschaften land vnd gebiet in satz wis ingeben vnd empfolhen haben nach siner brief lut vnd sag, die er darumb von vns inne hat. Dauon emphelhen wir uch allen vnd jeglichem besunder, dem dirre brief gezaigt wirt, daz ir dem egenanten von Toggenburg huldent vnd swerent gehorsam vnd gewertig ze sind mit allen vnsern schlossen vesten nutzen sturen rechten vnd gewonheiten nach sins phantbriefs sag, vndb-) wann ir im also gehuldet hand, so sagen wir uch vwer gelupde vnd ayden, so ir vns getan hand, fur vns vnser pruder vettern vnd erben quit ledig vnd los mit dem brief-b). Wir erlassen och den egenanten von Toggenpurg aller siner gelupde vnd ayden, so er vns getan hat, vnd sagen in der och quit vnd ledig. Mit vrkund ditz briefs versigelt mit vnser baider ingesigeln. Geben ze Baden an mittichen nach dem suntag Cantate anno etc. CCCCo sexto.