Wir^a) frow Clement¹ wilant her Hainriches saeligen herren ze Hewen² L elichu wirtinn graefin von Toggenburg vnd ich Peter herre L ze Hewen³ ir elicher sun tunt menglich kunt vnd veriehent offenlich L mit vrkund dises briefes, daz fur vns kam des tages, als diser brief geben ist, der from vest Walther von Gachnang⁴ her Walthers seligen von Gachnang elicher sun, vnd durh siner ernstlicher bette willen luhent wir im ze rehtem manlehan ainen hof lit ze Thinhart⁵ in dem Turgow mit holtz mit veld mit wunn mit waid mit allen nutzen rehten ehafti gewonhaiten vnd mit allen zu gehorden vnder der erd vnd dar ob, der selb hof von vns manlehan ist, der selb hof jaerlich giltet zehen mut kernen vnd dru malter habern Winterturer⁶ mess drissig schilling haller vnd hunr vnd aiger, vnd hânt das lihen getan frilich vnd vnbetwungenlich mit worten mit werchen mit gebaerden vnd mit allen dingen, so dar zu notdurftig was. Vnd dez alles ze warem vnd offenem vrkund habent wir obgenant frow Clement vnd Peter herre ze Hewen ir elicher sun vnseru insigel offenlich gehenket an disen brief. Der geben ist ze Engen⁷ in der statt des jares, do man zalt nâch Cristi geburt druzehen hundert vnd nuntzig jar, dar nâch in dem sibenden jar, an dem nachsten samstag nâch sant Michels tagg.