Ich^a) Hans Birchtel vnd ich Waltz Vogelli baide maister vnd pfleger des spitals dez hailigen gaistes ze Lindow¹ tund kunt vnd veriehin L offenlich mit disem brieff allen, die in ansehent oder horent lesen, daz wir an dez obgenanten spitals stat vnd von sinen wegen vnd ouch L durch nutz vnd bessrung willen dez selben obgenanten spitals vnd ouch von haissentz wegen dez burgermaisters vnd dez rates gemainlich L ze Lindow dem erbern man Josen dem Custor von Hochst² vnd allen sinen erben recht vnd redlich ains rechten redlichen staten vngeuerlichen vnd ewigen koufs verkouft vnd ze kouffent gegeben habin die wise in Fussacher³ meder gelegen, stozt vndan an die wise genant die Lang wise vnd obenan an die wise genant Schafhuser mad vnd ainhalb an die wise genant des Pfaffen mad mit aller zugehord vmb zwelff pfund pfenning genger vnd guter Costentzer muntz, die ouch alle in des obgenanten spitals redlichen vnd guten nutz vnd fromen komen vnd bewent sint, vnd also habin wir im vnd sinen erben die selben vorgenanten wise mit aller zugehord an dez vorgenanten spitals stat vnd von sinen wegen ouch geuertgot vnd mit lehenschaft in ir hand vnd gewalt braucht von vnsern gnedigen herren von Osterrich, dannen si ouch lehen ist, als vmb semlichu gute vnd lehen gewonlich vnd recht ist ze vertgent, ane geuard, vnd den ouch iarklich gen Veltkirch⁴ zwen vierling kernen zwen vierling haber vnd sechs pfenning ze rechtem zinse daruss gat vnd gan sol, vnd darumb so sullen wir vnd der obgenant spital vnd alle sin maister vnd pfleger, wer die sint vnd werdent, vmb die vorbenemt wise mit aller zugehord vnd dis koufs, alz vorbeschaiden ist, dez obgenanten Josen Custers vnd siner erben recht weren sin vff gaistlichem vnd vff weltlichem gericht gen aller menglich vnd an allen den stetten, wa si dez nach dem rechten bedurffent ald notdurfftig werdent, ane geuarde. Vnd also ist dirre vorgescriben kouf geschehen vnd vollefurt mit allen den worten werken vnd getaten, so von recht oder von gewonhait darzu gehort vnd notdurftig waz. Vnd dez allez ze offem vnd warem vrkund vnd stater ewiger sicherhait so gebin wir die obgenanten spitals pfleger Hans Birchtel vnd Waltz Vogelli fur vns vnd fur den obgenanten spital vnd fur alle sin pfleger dem obgenanten Josen dem Custor vnd sinen erben disen brieff daruber geuestnot vnd besigelt mit des obgenanten spitals ze Lindow aigen angehenkten insigel. Der geben ist an dem nechsten samstag nach sant Matheus tag dez hailigen zwelffbotten nach Cristus geburt druzenhundert jar vnd darnach in dem siben vnd nuntzigosten jar.