Dem^a) hochgelopten allerdurchluchtigosten fursten minem gnadigen herren kunig Wentzelâw L von gottes gnaden Romscher kunig ze allen ziten merrer des hailigen richs vnd L kunig ze Behaim enbut ich grâf Albrecht von Werdenberg vom Hailigenberg der L elter herre ze Bludentz minen willigen gehorsamen vnd vndertanigen dienst in allen vwren sachen. Edler hochgelopter furst vnd gnadiger herr, alz min lieber bruder grâf Hug salig von Werdenberg vom Hailigenberg von todes wegen laider abgangen ist vnd darvmb ich vormals zu vwren genâden komen bin vmb du lehen, die der selb min bruder grâf Hug von vch vnd dem rich ze lehen hatt, vnd du lehen von vwren gnaden enpfangen hân, die ir mir ôch gnadeklich vnd tugentlich verlihen hand, sol vwer furstlich gnad wissen, das ich mit minem lieben bruder grâf Hainrchen von Werdenberg vom Hailigenberg herre ze Rinegg lieplich vnd fruntlich vberain komen bin, das der beliben sol bi der herrschafft ze Werdenberg vnd bi der vesti genant Starkenstain vnd bi allen luten vnd gutern, so darzu gehort, ez sig benemptz oder vnbenemptz, das der selb min bruder grâf Hainrich vnd sin erben bi den selben guten vnd gutern beliben sond. Vnd dauon, gnadiger herr, du selben gut, da ich da von vwren gnâden enpfangen hân, die send ich vch vff in vwer hand mit disem minem offenn brief vnd bitt vwer furstlich gnâd, das ir die selben gut vnd lehen lihen wellint dem vorgenanten minem lieben bruder grâf Hainrichen von Werdenberg herre ze Rinegg vnd in darzu furdern wellint nach dem besten. Das sond er vnd ich vnd alle ander sin frund vmb vwer gnad allzit verdienen. Vwer gnad sol mir ôch allzit gebieten in allen sachen, wan ir mich willig vinden sont ze tund, was vwren gnaden lieb vnd dienst ist. Des alles ze warem vrkunt send ich vwren gnaden disen brief besigelten mit minem aignen an gehenkten insigel. Geben ze Lindow an dem nachsten zinstag nach mittervasten in dem jar, do man zalt nach Cristus geburt druzehen hûndert jar, darnach in dem nuntzigosten jâr.