Wir^a) Leupolt von gots gnaden hertzog ze O^ester(rich)¹ ze Stey^er ze Kernden vnd ze Krain graf ze Tyrol etc. || tůn kunt fur vnser bruder vns vnd vnser erben, daz wir den edeln vnsern lieben o^eheimen graf Donaten vnd || graf Fridreichen von Toggenburg² seinem vettern gelten su^ellen vnd schuldig sein zwelfhundert gůter guldein, die || si vns berait gelihen habent vnd die an vnsern nutz komen sind an der kost ze Rapreswile³ vnd ze Kyburg⁴, so wir y^etzund in disem krieg daselbs gehabt haben, vnd dieselben zwelfhundert guldin wir den egen(anten) vnsern o^eheimen von Toggenburg vnd irn erben geslagen haben auf den satz ze Kyburg, den si von vns innhabent, vnd auch zu pezzrer phantschaft dartzů versetzt haben vnd setzen auch wizzentlich vnser stat ze Bu^ellach⁵ mit aller vnd gantzer zůgeho^erung, als die an vns komen ist, also daz si die auf dem egen(anten) satz ze Kyburg haben súllent ân aller mazz, als si ander gelt vormaln darauf habent nach irer brief sag, vnd dartzů auf der egen(anten) vnserr stat ze Bu^ellach vnd irer zugeho^erung als lang, vntz daz wir die von in erledigen vnd erlo^esen vmb das gelt, darumb si in von vns stent, derselben losung si vns auch stat tůn súllent, wenn wir der begern, ân geuerde, doch su^ellen wir ains ân das ander nicht lo^esen auch an geuerde. Mit vrchu^end ditz briefs. Geben ze Baden⁶ an sand Symons vnd sand Judas tag der heiligen zwelfbotten nach Christs gebu^ert dru^etzehenhundert iar, darnach in dem sechs vnd achtzigistem jare.

Source Fulltext: Chartularium Sangallense X, Nr. 6155, S. 349-350.