Wir Kathrin von gottes verhengd a^ebtischin vnd der couent gemainlich des gotzhus ze Maggnow¹ des ordens von Cytel kúnden vnd veriehen offenlich || an disem brief vmb dú nachgeschriben gu^eter, dú der ersam wolbeschaiden Růdolf der Bader Cůnrates sa^elgen des Baders von sant Gallen sun burger || ze Costentz von vns vnd vmserm^a) gotzhus ze lehen hat vnd dú och a^ellú gelegen sint in dem bann vnd in der kilchho^eri ze Stekboren², des ersten || den wingarten, den man nemmet in der Hůb³, dauon er vnd alle sin erben vnd nachkomen vns vnd vnserm gotzhus iarklich uf sant Martis tag gent vnd geben sont ain halb phunt wachs, vnd ain wingarten, den man^b) nemt an der Henki⁴, dauon er o^vch ia^erklich uf sant Martis tag er vnd alle sin erben vnd nachkomen vns vnd vnserm gotzhus gent vnd geben so^ellent ain vierdung wachs, vnd ain wingarten, den man nemmet am^a) dem Grin⁵, dauon och er vnd sin erben vnd nachkomen vns vnd vmserm^a) gotzhus gent vnd geben sont ia^erklichs uf sant Martis tag ain halben vierdung wachs, vnd ain wingarten, den man nemt Eberhartz akker, da von och er vnd alle sin erben vnd nachkomen gent vnd geben sont ia^erklichs uf sant Martis tag ain halben vierdung wachs. Wanne der selb Růdolf der Bader alder sin erben vnd nachkomen, die die vorgeschribenn wingarten (i)nne^c) hant, vns vnd vnserm gotzhus den vorgeschribenn zins ia^erklich rihtent vnd werent, als vor beschaiden ist, so sont si von vns frie vnd ledig sin aller dienst vnd vordrung von den vorbenemten gu^etern, vnd sagent dú och ledig aller versessner zins, die man vns von den selben gu^etern solt han gegeben vnd geriht vntzit uf disen hútigen tag. Vnd des ze warern vrkúnd vnd sicherhait aller vorgeschribener dingen geben wir dem selben Růdolf Bader disen brief besigelten mit vnsern insigeln. Der geben ist in vnserm gotzhus ze Magnow, do man zalt von Cristes gebúrt drúzehen hundert iar, dar nach in dem vier vnd sechzigosten iar, an sant Johans abent des To^vffers.

Source Fulltext: Chartularium Sangallense VIII, Nr. 4941, S. 138-139.