Allen den, die disen brief sehent lesent oder ho^erent lesen, kúnd ich Johans Tôsser¹ vnd vergich || offenlich mit disem brieue fúr mich vnd alle min erben, daz ich kam ze sant Gallen fúr den êr||wirdigen minen gna^edigen herren abt Georien von gottes gnâden abt dez gotzhus ze sant || Gallen², vnd fúr diz nâchgenemten lút Walther Hússlin, Margarethen sin êlichen hûsfro^vwen, Cůnraten vnd Gêrdrûten irú kint vnd fúr Johansen dez vorgenemten Walthers swester sun, die ich verko^vft han vnd ze ko^vffenn geben han maister Jacoben von Vtznach³, do gab ich mit wolbedâhtem můt ledklich v^f an dez obgenanten mines herren abt Georien hant an dez vorbenemten gotzhus stat die schůppůss ze Landoltzwald⁴, die man nemmet Winikas schůppůss, vnd o^vch diz nâchgenemten lút Cůnraten von Sekki⁵ vnd Ma^ehthilten von Sekki mit allen rehten vnd mit aller zů geho^erde, die min reht aigen wârent, vnd enpfieng do von dem obgenanten minem herren abt Georien die vorgeschribenen schůppůss ze Landoltzwald vnd o^vch die vorgenemten Cůnraten von Sekki vnd Ma^ehthilten von Sekki mit allen rehten ze rehtem lehen. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht so han ich Johans Tôsser da vorgenemt fúr mich vnd alle min erben min insigel gehenkt an disen brief. Der geben ist ze sant Gallen an der na^ehsten mitwûchen nach sant Angnesen tag in dem jar, do man zalt von gottes gebúrt drúzehenhundert jâr, sehszig jâr vnd darnâch in dem dritten jâre.

Source Fulltext: Chartularium Sangallense VIII, Nr. 4850, S. 65.