Allen den, die disen brief ansehent lesent oder ho^erent lesen, tůn ich Albreht von Lindenberg schulthais ze Wil¹ kunt vnd vergich offenlich mit disem brief, daz fúr mich kamen ze Wil in der stat, do ich offenlich || ze geriht sasse, Hainrich von Gloten² vnd Adelhait sin elichi wirtinne vnd offenoten da mit fúrsprechen vnd sprachen, daz sú von iro redlichen not wegen Johansen den Wagman, der iro aigen wa^er vnd der vorgenemten || Adelhaiten gewert pfand wa^er mit andren lúten vnd gu^etern, so ir der vorgenemt Hainrich von Gloten versetzet hetti, mit lib mit gůt vnd mit allen rehten reht vnd redlich verkoft hettin vnd hettin ze koffenn || geben dem erwirdigen herren abt Hainrichen von gottes verhengnúst abt des gotzhus ze Rúti³ vnd dem selben gotzhus vmb drú pfunt pfenning gůter Costenzer múns vnd wa^erin och der selben pfenning gantzlich von im gewert an den stetten, da sú iren fromen mit geschaffot hettin, vnd wo^eltin o^vch den selben Johansen dem vorgenemten abt Hainrichen vnd dem gotzhus ze Rúti vfgeben vnd vertgon, als reht wa^er, vnd baten mich erfarn an ainer vrtail, wie sú daz tůn so^eltin, daz es kraft hetti nu vnd hienach, do fragt ich vorgenemter rihter vrtail vmb vnd ward ertailt mit gemainer vrtail, daz der vorgenemt Hainrich von Gloten daz mit siner hand an dez gerihtes stab in des vorgenemten abt Hainrichs hand tůn so^elt vnd daz die vorgenemt Adelhait sin elichi wirtinne na^em ainen vogt an dem ring mit des vorgenemten ir elichen mannes willen vnd daz si der selb ir vogt fůrti ze drin malen vsser des gerihtes ring vnd si ze ieglichem mal fragti, ob si es vnbetwngenlich ta^et vnd willeklich vnd gern tůn wo^elt, vnd dann daz mit ir vnd mit des selben ir vogtes handen och an des gerihtes stab tůn so^elt vnd daz es also wol kraft hetti nâh dem rehten, daz tet och si vnd nam do die vorgenemt Adelhait ze vogt Berthellin Niesselin vogt ze Swarzenbach⁴ iren o^ehaim mit des vorgenemten ir elichen mannes willen, dem ich och die vogtye nâh des landes gewonhait verleh vmb die sach, der fůrt si ze drin malen vsser des gerihtes ring vnd frag si ze ieglichem mal, als im vormals ertailt was, ob si es vnbetwngenlich ta^et vnd willeklich vnd gern tůn wol, der sait och bi sinem aid, daz si es vnbetwngenlich ta^et vnd willeklich vnd gern tůn wo^elt, vnd gab do der vorgenemt Hainrich von Gloten mit siner hand vnd och die vorgenemt Adelhait mit ir vnd mit des vorgenemten ir vogtes handen den vorgenemten Johansen den Wagman mit lib mit gůt vnd mit allen rehten lekklich vf an des gerihtes stab in des vorgenemten abt Hainrichs vnd des gotzhus handen ze Rúti, vnd enzeh sich och da der vorgenemt Hainrich von Gloten mit siner hand vnd och die vorgenemt Adelhait mit ir vnd mit des vorgenemten ir vogtes handen offenlich vor geriht vnd enzihent sich mit disem brief fúr sich fúr alle ir erben vnd nâhkomen gen dem vorgenemten abt Hainrichen gen sinen nahkomen vnd gen dem selben gotzhus ze Rúti aller aigenschaft aller lehenschaft aller manschaft aller gewer aller besatzung aller zúgnúst lút vnd brief alles rehten gaistlichs vnd weltlichs gerihtes aller vordrung vnd ansprach, so sú zů dem vorgenemten Johansen dem Wagman zů sinem lib ald zů sinem gůt ald daran hatten oder von kainerlai sach wegen iemer gehan gewinnen oder erwerben mo^ehten von reht oder von gewonhait. Der vorgenemt Hainrich von Gloten vnd Adelhait sin elichi wirtinne hant och gelobt fúr sich vnd fúr alle ir erben, des vorgenemten Johansen Wagmans wer ze sin fúr aigen nâh reht, wenn sin der vorgenemt abt Hainrich sin nahkomen ald daz vorgeschriben gotzhus ze Rúti ald der vorgenemt Johans Wagman bedarf vnd notdurftig ist, ân geua^erd. Vnd ist dis alles reht vnd redlich beschehen vnd volfu^ert mit allen den Worten vnd werken, so nâh gewonhait vnd nâh reht darzů gehorten vnd notdurftig waren vnd als reht sitte vnd gewonlich was. Vnd ze offenem waren vrkúnd vnd sta^eten sicherhait aller diser vorgeschriben ding henk ich Albreht von Lindenberg schulthais da vorgenemt min insigel von des gerihtes wegen an disen brief. Darnach veriehen wir die vorgenemten Hainrich von Gloten, Adelhait sin elichi wirtinne vnd Berthelli Niesseli vogt in diser vorgeschriben sach am gantz warhait aller diser vorgeschriben ding vnd daz alles daz war ist, daz von v´ns an disem brief geschriben stat, vnd ze merer sicherhait der selben ding henken wir die vorgenemten Hainrich von Gloten vnd Berthelli Niesseli v´nsri insigel och an disen brief, vnder des vorgenemten Berthellis Niesselis mines vogtes insigel ich die vorgenemten Adelhait mich willeklich verbunden hân vnd bind mit disem brief, won ich aigenes insigels nút enhân, war vnd sta^et ze lassenn alles, daz von mir an disem brief geschriben stat. Der geben ist ze Wil in dem jar, do man zalt von gottes gebúrt drúzehenhundert jar, sechzig iar vnd darnach in dem dritten jare, an dem na^ehsten zinstag nâh sant Anthonien tag.

Source Fulltext: Chartularium Sangallense VIII, Nr. 4849, S. 63-65.