Allen, die disen gegenwúrtigen brieff ansechint alder ho^erent lesen, kúnden wir her V^olrich von Ramenswag¹ rytter vnd vogt ze Merspurg², der raut vnd die burger gemainlich der statt ze Merspurg, dz Hartman Lúph von Růdelingen³ der júnger fúr v´nns kam vnd verjach da offennlich vmb den wingarten, der ze Merspurg by dem obern tor gelegen ist vnd ainhalb stosset an des byschoffs wingarten von Costentz vnd andrett an Otten des Schůlers wingarten aines burgers ze Costentz vnd der an in geuallen ist von sinem enin vnd von siner anen sa^eligen, dz die zwen tail des selben wingartten vnd der nutz, der da von ja^erlich wirt vnd geuallet, swo^ester Katherinen siner swo^ester^a), ze Maggenow⁴ in dem closter ist, ze ainem rechten lipding, die wil sy lebet, werden vnd geuallen sol, vnd wenn die selb swo^ester Katherin enist vnd erstirbet, so sond die selben zwen tail des selben wingarten mit allem recht dem gotzhuß ze Maggenow vnd dem conuent vnd allen ir nachkomen dannenhin ewenklich geuallen sin vnd růweklich beliben. Ist ouch, dz der vorgenant Hartman one lib erben stirbet, so sol der vorgenant sin tryttail des wingarten ouch dem selben gotzhuß vnd dem conuent ze Maggenowe mit allem recht ledig sin vnd ewenklich beliben. Vnd ist, dz dis also ze schulden kumpt, dz inen die vorgenanten dry tail des wingarten geuallent, so sond sy dar nach innrent der na^echsten jars frist von dem selben gůtt tůn vnd gehorsam sin, als der statt ze Merspurg recht vnd gewonhait ist vnd des sy nit enbern wennd. Vnd wonn dise vergicht vor v´nns also beschechen vnd vollefu^ert ist, als vor ist beschaiden, so habin wir der vorgenant her V^olrich von Ramenswag vnd die burger gemainlich der statt ze Merspurg durch ir aller bett der vorgenanten^b) disen brieff mit mins her V^olriches von Ramenswag vnd mit der statt ze Merspurg insigelen besigelten. Diß beschach vnd ist dirre brieff ze Merspurg geben, do man von Cristus gepúrt zalt M°CCC° XXXVII ja^vre, an dem na^echsten sunnentag vor sant Gallen tag.

Source Fulltext: Chartularium Sangallense VI, Nr. 3674, S. 269.