Allen den, die disen brief an sehent lesent oder ho^erent lesen, kúndent wir Peter von Diemberg¹, Anne Johans des Múnsers sa^eligen wirtin von Schafhusen², Elysabet || Johans von Girsperg³ sa^eligen wirtin, swestran dez vorgenanten Peters, Anne Hainrichs wirtin von Lo^emberg⁴, Anastasi Diethelms wirtin von Windegge⁵, Johans vnde || Herman von Ottikon⁶ gebru^eder, Johans vnde Růdolf gebrůder von Múnchwile⁷, daz wir frilich vnde vmbezwvngelichen mit bedahtem můt vmbe die gůtlichi, || die vns vnser liebú mům fro^v Elysabet hern Eberh. von Eppenstain⁸ hie vor elichú wirtin ha^vt geta^vn vnde allú zit tůt, verziehen vns fúr vns selbe vnde fúr vnser nach komen vnde erben alles dez rehtes vnde der ansprauch, so wir múgin alder mo^ehtin geha^vn an dem varden gůt, das dú vorgenant Elysabet von Eppenstain ha^vt vnde nach ir toude la^vt, si hab es ietz alder hernach, es si golt silber gestain klainatt korn win alder wie es genant si, a^vn dú pfender, die sú la^vt, da hat aber si gewalt vz zetůnde, was si wil, vnde dar an súlin wir si nit en irren. Vnde habin gesworn zů den hailigen ain gelerten ait, das wir si noch nieman, dem si daz selbe vorgenant varent gůt ordenet alder geschaffen hat bi irem lebendem libe, in kain weg irren sund noch beswern, wa^er aber, daz si bi irem lebendem libe das^a) varent gůt nit het geordenot noch geschaffen gar vnde gentzlich, was dan vngeordenot belibe nach ir toude, das sund die lútte vs rihten durch ir selle willen, da es aller wa^egst ist, an die si es gesetzet, vnde habin wir bi dem selben ait gelobt, die lútte nit ze irrent in kain weg, es si mit geriht ald a^vn geriht. Wir sun in dar inne geholfen sin a^vn gefa^erde mit gantzen trúwen. Vns ist och behalten, wa^er das dú vorgenant fro^v Elysabet von Eppenstain vns alder vnser aim iht ordeneti von dem varden gůt, daz mugin wir wol vorderen. Dis ist bescha^ehen mit aller der behúgt, so zů sollichen vergihten notdúrftig sind. Vnd zů ainem vrkúnde aller der ding, so hie vorgescriben sta^vtt, so henk ich^b) der vorgenant Peter fúr mich selbe vnde fúr mine swestran der vorgenanto, der vogt ich bin vnde mit minem gunst vnde willen gesworn ha^vnd, min insigel durch ir bett willen an disen brief^c). Wir Hainrich von Lo^emberg vnde Diethl. von Windegge vergehen och an disem brief, daz vnser husfro^vwen die vorgenanten dis gelúbt ha^vnt geta^vn mit vnserem gunst willen vnde haisen, vnde dar vmbe so henken wir vnser insigel an disen brief fúr vns vnde fúr vnser husfro^vwen, wan si nit aigern insigel ha^vnde, durch ir bette willen. Wir Johans vnde Herman von Ottikon gebrůder, Johans vnde Růdolf von Múnchwile gebrůder die vorgenanten henken och vnserú insigel an disen brief. Dir brief war gegeben, do man zalt von Cristes gebúrt drúzehenhundert iar, dar nach in dem súben vnde drissigosten jar, an sant Verenen tag, indict. quinta.

Source Fulltext: Chartularium Sangallense VI, Nr. 3672, S. 267-268.