Wir brůder Johans von gottes verhengnisse abt des gotzhuses ze Kappel¹ vnd der . . conuent gemeinlich des ordens von Cytel in Kostentzer bischtům vnd ich || her Burk. von Wartense² ritter kúnden allen den, die disen brief an sehent oder ho^erent lesen, das wir der vorgenande abt vnd der . . conuent gemeinlich von || Cappel von einem teile vnd aber ich der egenande her Burk. von Wartense ze fron Katherinen miner elichen wirtin wegen, dv´ Hermans Bibers seligen tochter was, der || elicher wirt vnd rechter vogt ich bin, von dem andern teile einhelleklich mit gůtem rate wider einander v´berein komen sin, als hie nach geschriben stat. An dem ersten so haben wir der obgenande abt vnd der . . conuent gemeinlich dem vorgeseiten von Wartense vnd fron Katherinen siner elichen wirtin vnd ir erben vnd nachkomen gantzlich ledig verlassen fúnf fiertel kernen geltes, die man vns jerlich gab von den jarziten, so hern Walthers von Sant Peters seligen wirtin gesetzet hatte vf dv´ gu^eter, als die brieve wol bewisent, die dar v´ber geben sint. Dar zů haben wir in geben fúnfzehen fiertel kernen versessens zinses, der si vns schuldig waren, vnd haben inen ovch geben fúnf pfvnt nv´wer Zúricher pfenningen, der si ovch gantzlich von vns gewert sint. Har zů sol man fúrbas wissen, das wir dem vorgenanden hern Burk. von Wartense vnd fron Katherinen siner elichen wirtin die genade getan haben, das wir vnder ir reben hin ab vnserm egenanden gůte achtzehen bo^vme haben ab geslagen, die ir reben schedelich waren, vnd haben ovch gelobt fúr vns vnd vnser^a) nachkomen, die wir hie zů binden, das an der selben bo^vmen stat vnder ir reben zweintzig schůhen breit vf vnserm eigen, als verre ir reben ob vnsern gu^etern ligent, niemer enkein bo^vm stok noch widbant wachsen noch werden sol, das ir gůte schatten ald schaden bringen mo^echte, ane alle geverde. Wir súln in o^vch steg vnd weg geben von dem sêwe vf vntz in ir reben, ir bv ir bender stagel vnd schijen vf ze tragenne vnd ir win ab ze tragenne vnd ander ir notdurft da ze tv^enne vnsern gu^etern vnschedelich vnd vnw^esteklich, den selben weg, den wir ovch niessent sin von dem sewe vf vntz an den weg, den si vns geben hant von ir gůte. Ovch ist es also beret, das wir vnd vnser nachkomen inen fride zů ir gu^etern súln geben vnd machen von der lantstrasse abe, als verre vnser gůt gat, abe vntz an ir reben mit einem túrlin ald mit einer húrde. Hie wider so han ich her Burk. von Wartense ze der vorgenanden fron Katherinen miner wirtin vnd ir erben wegen dem obgenanden . . abte vnd dem . . conuente des vorgenanden klosters ze Cappelle ovch ledeklichen vnd frilichen fúr frijes eigen geben einen acker ist gelegen ob Ertbrust³ vnden an der herstrasse entzwischent der egenanden herren acker von Cappel vnd einhalb ovch an ir reben vnd an die reben, so man nemmet ze Wige, stosset, vnd anderthalb an hern V^olrichs des pfrůnders von Kilchberg⁴ reben stosset, vnd dar zů ein acker stuki ist gelegen ob ir bo^vngarten, dar an lantstrasse halb V^olr. Fútschis gůt stosset, vnd niderthalb stosset an Heinr. Eschwurmes gůt. Dar zů so han ich in ovch ze der vorgenanden miner wirtin vnd ir erben wegen geben einen weg von der lantstrasse abe durch vnser reben nider vntz vf Heinrichs Eschwurmes reben, als ovch der selbe weg mit offenen marksteinen vs gezeichent ist, vnd ovch ob den selben reben vnd entzwischent vnsern reben vntz vf ir gůt han ich in eweklich geben einen weg, der zehen schůch wit sin sol ane geverde, vnd swas von mir vnd von der vorgenanden miner wirtin an disem brieve geschriben stat, das loben ich ze der selben miner wirtin vnd ir erben wegen, die si mit miner hant her zů verbunden hat, stete ze haltenne vnd hie wider niemer ze tu^enne mit gerichten geistlichen noch weltlichen noch mit enkeinen andern sachen ane alle geuerde. Ovch vergehen wir der vorgenande abt vnd der . . conuent gemeinlich vnd binden alle vnser nachkomen her zv^o vesteklich, alles das hie vor geschriben stat war vnd stete ze haltenne, so mit worten vnd artikeln an disem brieve geschriben vnd erlúchtet ist, vnd hie wider niemer ze tv^enne weder mit geistlichen noch mit weltlichen gerichten noch mit enkeinen andern sachen. Vnd hier v´ber ze einem wâren vnd steten vrkúnde aller der dingen worten vnd artikeln, so vor von vnser ietwederm teile geschriben sint, so haben wir der vorgenande . . abt vnd der . . conuent des klosters ze Cappel vnd ovch ich der vorgenande her Burk. von Wartense dirre brieven zwene gelich geschriben mit vnsern insigeln offenlich besigelt. Dar zů haben wir von beiden teilen den vesten ritter hern Heinr. den Biber erbetten, das er ze einer waren erkantnisse der vorgeschriben dingen sin insigel ovch an dise zwivalten brieue gehenket hat. Dis geschach ze Ertbrust an sant Andres tag in dem jare, do man von gottes gebúrte zalte drv´cehenhundert vnd drissig jar vnd dar nach in dem sechten jare, da ze gegen waren her Růd. von Wartense korherre der kilchen ze der probstey Zúrich⁵, brůder Nycl. der grosser keller ze Kapelle, brůder Jacob schaffener ze Ertbrust, her Albr. pfrůnder ze Kilchberg, Růd. vnd Walther die Herten gebrůdere, V^olr. Eschibach, . . Berghein von Talwile⁶, Heinr. vnd Jacob Eschwurm, Chůnr. Múller von Adeleswile⁷ vnd Jacob Graser. Ich her Heinr. Biber ritter han ze einer waren erkantnisse der vorgeschriben dingen durch beider teilen bette min insigel gehenket an dise briefe in dem jare vnd an dem tage, als vor geschriben stat.

Source Fulltext: Chartularium Sangallense VI, Nr. 3641, S. 246-248.